چھنگ دو (شِنہوا) چین کے جنوب مغربی صوبے سیچھوان میں 2 ہزار 400 میٹر گہری فزکس لیبارٹری فعال ہوگئی۔ یہ دنیا کی گہری ترین اور سب سے بڑی زیر زمین لیبارٹری بھی ہے۔

سائنس دانوں کے مطابق لیبارٹری انہیں ایک "صاف" جگہ مہیا کرتی ہے تاکہ وہ ڈارک میٹر نامی غیر مرئی مادے پر تحقیق کرسکیں۔

انہوں نے کہا کہ انتہائی گہرائی زیادہ تر ان کائناتی شعاعوں کو روکنے میں مدد کرتی ہے جو مشاہدے میں گڑبڑ کرسکتی ہیں۔

فرنٹیئر فزکس تجربات کے لئے گہری زیرزمین اور انتہائی کم تابکاری کا پس منظر رکھنے والی سہولت (ڈی یو آر ایف) سیچھوان کے لیانگ شان یی خوداختیار پریفیکچر میں جن پھنگ پہاڑ کے نیچے واقع ہے۔

ڈی یو آر ایف کی مجموعی گنجائش 3 لاکھ 30 ہزارمکعب میٹر ہے۔ یہ چائنہ جن پھنگ زیرزمین لیبارٹری کا دوسرا مرحلہ ہے۔ اس کی تعمیر دسمبر 2020 میں شروع ہوئی تھی اور اسے سنگھوا یونیورسٹی اور یالونگ ریور ہائیڈرو پاور ڈویلپمنٹ کمپنی لمیٹڈ نے مشترکہ طور پر تعمیر کیا ہے۔

سنگھوا یونیورسٹی کے پروفیسر یو چھیان نے بتایا کہ ڈی یو آر ایف ایک عالمی معیار کا انٹرڈسپلنری ڈیپ انڈرگراؤنڈ سائنسی تحقیقی مرکز بنے گا جس میں ذراتی طبیعیات، نیوکلیئر ایسٹروفزکس اور لائف سائنسز سمیت متعدد مضامین شامل ہوں گے تاکہ متعلقہ فرنٹیئر شعبوں میں چین کی تحقیقی ترقی میں سہولت مہیا کی جاسکے۔