بیجنگ (شِنہوا) چین نے ملک سےغیر ملکی سرمائے کے انخلا کے بارے میں خدشات مسترد کرتے ہوئے اس بات پر زور دیا ہےکہ ملک میں غیر ملکی سرمایہ کاری کو راغب کرنے کے لئے متعدد سازگار حالات موجود ہیں۔

چین کی مالیاتی اور اقتصادی امورکے بارے میں مرکزی کمیٹی کے دفتر کے ایک عہدیدار نے  کہا کہ ملک کی سپر بڑی مارکیٹ، مکمل صنعتی  اور نئے ترقیاتی نظام  میں عالمی کاروباری اداروں کے لیے بے پناہ مواقع موجود ہیں۔

عہدیدار نے کہا کہ چین کی فی کس جی ڈی پی 12 ہزار امریکی ڈالر سے زائد ہوچکی ہے اور اس کا درمیانی آمدن والا گروپ 40 کروڑ سے زائد افراد پر مشتمل ہے  جس سے وسیع امکانات کے ساتھ ایک بڑی مقامی مارکیٹ تشکیل دی گئی ہے۔

چین واحد ملک ہے جس کے پاس اقوام متحدہ کی  تمام صنعتی درجہ بندیاں موجود ہیں اور اس کے صنعتی فوائد کی دوسرے ممالک میں نظیر نہیں ملتی۔

یہ بیان ایسے وقت میں سامنے آیا ہے جب چین نے ایک ہفتہ قبل اپنی سالانہ سینٹرل اکنامک ورک کانفرنس منعقد کی تھی جس میں 2024 میں اقتصادی سرگرمیوں کی ترجیحات کا فیصلہ کیا گیا تھا۔ چینی رہنماؤں نے کانفرنس میں اعلیٰ معیار کے کھلے پن کو وسعت دینے کا عہد کیا۔

چین کی براہ راست غیر ملکی سرمایہ کاری کےبارے میں میڈیا رپورٹس کا جواب دیتے ہوئے عہدیدار نے کہا کہ ابتدائی 10 ماہ میں کمی کے باوجود سرمایہ کاری کا حجم بلند سطح پر ہے۔ خدمات اور اعلیٰ ٹیکنالوجی مینوفیکچرنگ میں کی جانے والی غیرملکی سرمایہ کاری میں زیادہ تیزی سے اضافہ ہوا ہے۔

عہدیدار نے سرمایہ کاری کے اعداد و شمار میں حالیہ اتارچڑھاؤ کی وجہ بڑھتے ہوئے جغرافیائی سیاسی خطرات کے ساتھ تیزی سے بدلتے ہوئے بیرونی ماحول، وبائی مرض کے باعث چین کی حقیقی صورتحال سے متعلق غلط فہمی اور بدلتے ہوئے تقابلی فوائد کے تناظر میں کچھ مزدوروں پر مبنی صنعتوں کی منتقلی کو قرار دیا۔

عہدیدار نے مستقبل کو مدنظر رکھتے ہوئے ادارہ جاتی کھلے پن کے مسلسل فروغ ، پیداوارای شعبے میں غیر ملکی سرمایہ کاری پر عائد تمام پابندیاں ختم کرنے، ٹیلی کمیونیکیشن اور طبی خدمات میں کھلے پن کو وسعت دینے اور سرحد پار ڈیٹا کے بہاؤ اور سرکاری خریداری میں مساوی شرکت جیسے مسائل کو حل کرنے کا عہد کیا ہے۔

عہدیدار نے کہا کہ غیرملکیوں کے لئے چین میں کاروبار، تعلیم اور سفر کو آسان بنانے کے لئے بھی کوششیں کی جائیں گی۔