ووہان(شِنہوا)چین میں صحت کے شعبے میں تازہ ترین رجحانات کی نمائش کرنے والی ایک ایکسپو ووہان میں جمعہ کو شروع ہوئی جس میں مصنوعی ذہانت (اے آئی) کا نمایاں کردار بھی شامل ہے۔
ورلڈ ہیلتھ ایکسپو میں چین اور دنیا بھرسے1 ہزارسے زائد کمپنیاں طبی آلات، بائیو کیمیکل ادویات، روایتی ادویات اور بزرگوں کی دیکھ بھال جیسے شعبوں میں اپنی ٹیکنالوجیز اور مصنوعات کی نمائش کے لیے شریک ہیں۔
چار روزہ نمائش میں چین کی طبی خدمات میں کینسر کی سکریننگ سے لے کر دانتوں کے چیک اپ تک اے آئی کی وسیع ایپلی کیشنز پر روشنی ڈالی جا رہی ہے۔
مقبول نمائشوں میں ایک بس جیسی گاڑی ہے جواے آئی کی مددسے رحم کے نچلے حصے کے کینسر کی سکریننگ کرنے کی صلاحیت رکھتی ہے۔
موبائل لیب تیار کرنے والی ووہان میں قائم کمپنی لینڈنگ میڈ کے برانڈ مارکیٹنگ ڈائریکٹر وانگ لان نے کہا کہ اے آئی خود بخود اس بات کی نشاندہی کر سکتی ہے کہ آیا سیل کا نمونہ کینسرزدہ ہے یا نہیں جس سے تشخیص کی کارکردگی کو بہتر بناتے ہوئے ڈاکٹر کے کام کا بوجھ کم ہو جاتا ہے۔
ایک پورٹیبل اے آئی فنڈس کیمرہ جو کہ بیجنگ میں قائم آنکھوں کی صحت کی کمپنی ایئرڈوک نے تیار کیا ہے، 15 سیکنڈ میں سکین مکمل کرنے اور دو منٹ میں ڈیجیٹل ہیلتھ رپورٹ جاری کرنے کے قابل ہے۔
صحت کی یہ رپورٹس لوگوں میں صحت کے دیگر مسائل کے علاوہ ٹیومر، خون کی کمی، اور قلبی اور دماغی امراض کا خطرہ ظاہر کرتی ہیں۔
کمپنی کے سیلز ڈائریکٹر جیانگ ژینگ لونگ کے مطابق یہ کیمرہ 3کروڑ سے زائد آنکھوں کے معائنے کی رپورٹس کے تجزیے کی بنیاد پر 50 بیماریوں کی شناخت کرنے کے قابل ہے۔ یہ بیماریوں سے بچاؤ اور علاج کے لئے اعلیٰ معیار کے منصوبے بھی تجویز کرتا ہے۔
