شنگھائی (شِںہوا) شنگھائی میں چین کے پہلے مقامی طور پر تیار کردہ بڑے کروز جہاز کے نام کی رونمائی کردی گئی ہے۔

بلدیاتی ثقافت و سیاحت بیورو اور چائنہ اسٹیٹ شپ بلڈنگ کارپوریشن کروز ٹیکنالوجی ڈیویلپمنٹ کمپنی لمیٹڈ کی جانب سے منعقدہ ایک تقریب میں اس کا نام "اڈورا میجک سٹی" رکھا گیا۔ 

اس کا مقصد ایک انوکھا اور شاندار کروز تجربہ پیش کرنا ہے جو مشرقی اور مغربی ثقافتوں کا امتزاج ہے۔ کروز جہاز کے افتتاحی سیزن میں شنگھائی بطور ہوم پورٹ خدمات انجام دے رہا ہے۔

چائنہ اسٹیٹ شپ بلڈنگ کارپوریشن کروز ٹیکنالوجی ڈیویلپمنٹ کمپنی لمیٹڈ اور شنگھائی وائی گاؤ چھیاؤ شپ بلڈنگ کمپنی لمیٹڈ کے مشترکہ طور پر ڈیزائن اور تیار کردہ اس کروز جہاز کی لمبائی 323.6 میٹرز ہے  جبکہ وزن 1 لاکھ 35 ہزار 500 ٹن ہے جس میں 5 ہزار 246 مسافروں کی گنجائش ہے۔ توقع ہے کہ یہ 2023 کے آ خر  تک تیار ہوجائے گا۔

کروز جہاز کی کامیاب ترسیل کے بعد شنگھائی بندرگاہ اور ہمسایہ ممالک کے درمیان بین الاقوامی روٹس کا سلسلہ شروع ہو جائے گا۔

اس کے علاوہ چین اور دیگر ممالک کے درمیان ثقافتی تبادلے بڑھانے کے لیے درمیانے اور طویل مدتی راستے شروع کئے جائیں گے۔