بیجنگ (شِنہوا) چین نے کہا ہے کہ حقائق سے بارہا ثابت ہوچکا  ہے کہ امریکہ کی طرف سے جمہوریت کے لیے رچایا گیا ڈرامہ دنیا کے فائدہ کی بجائے ہمیشہ تباہی کا سبب بنا ہے۔

چینی وزارت خارجہ کے ترجمان وانگ نے ان خیالات کا اظہار باقاعدہ پریس بریفنگ میں اس ماہ کے آخر میں ہونے والی دوسری "سربراہی کانفرنس برائے جمہوریت " کے بارے میں رپورٹس سے متعلق ایک سوال کا جواب دیتے ہوئے کیا۔

وانگ نے کہا کہ یہ نام نہاد سربراہی کانفرنس برائے جمہوریت ' اصل میں جمہوریت کے خلاف ہے۔

انہوں نے کہا کہ نام نہاد "سربراہی کانفرنس برائے جمہوریت " نے واضح طور پر ملکوں کے درمیان ایک نظریاتی لکیر کھینچتے ہوئے دنیا میں تقسیم کو جنم دیا۔ یہ جمہوریت کی روح کے منافی ایک مضحکہ خیز شو ہے جس نے جمہوریت کی آڑ میں امریکی تسلط کو بے نقاب کیا، جس کی کئی ممالک کی جانب سے تنقید اور مخالفت سامنے آئی ہے۔

پیو ریسرچ سنٹر کے سروے کے مطابق، صرف پانچ امریکیوں میں سے ایک کو اپنی حکومت پر بھروسہ ہے، جو کہ تاریخ میں سب سے کم ہے۔ 65 فیصد کا کہنا ہے کہ زیادہ تر سیاسی امیدوار اپنے ذاتی مفادات کی تکمیل کے لیے انتخاب لڑتے ہیں۔ جرمنی میں قائم ڈالیا ریسرچ اینڈ الائنس آف ڈیموکریسیز کی طرف سے جاری کردہ رپورٹ کے مطابق، سروے میں شامل 50 فیصد سے بھی کم امریکیوں کا خیال ہے کہ ان کا ملک جمہوری ہے اور عالمی سطح پر 43 فیصد جواب دہندگان کا خیال ہے کہ ان کے ممالک میں جمہوریت کو امریکہ سے خطرہ ہے۔

ترجمان نے کہا کہ اگر امریکی جمہوریت اپنے ہی لوگوں کا اعتماد جیتنے میں ناکام ہے تو امریکہ یہ کیسے سوچ سکتا ہے کہ اسے جمہوریت پر دوسرے ممالک کو لیکچر دینے کا حق ہے۔