بیجنگ (شِنہوا) قومی امیگریشن انتظامیہ نے عوامی جمہوریہ چین میں غیرملکی مستقل رہائشی شناختی کارڈ کے ایک نیا ورژن کا اجراء شروع کردیا ہے۔

قومی امیگریشن انتظامیہ نے بتایا کہ پہلے روز 50 نئے کارڈز کی پہلی کھیپ غیرملکیوں کو جاری کی گئی جن کی مستقل رہائش کی درخواستیں منظور کی گئی تھیں۔

نئے کارڈ کے حامل افراد کا تعلق امریکہ، جرمنی، برطانیہ، فرانس اور روس سمیت 20 سے زائد ممالک سے ہے اور انہوں نے چین کی سماجی و اقتصادی ترقی میں نمایاں کردار ادا کیا ہے۔

ان میں غیر ملکی اعلیٰ سطح کے انتظامی اور تکنیکی اہلکار شامل ہیں جو طویل عرصے سے چین میں کام کر رہے ہیں۔ اس کے علاوہ ان میں غیرملکی پروفیسرز اور اسکالرزبھی شامل ہیں جو عرصہ دراز سے اہم یونیورسٹیز اور تحقیقی اداروں میں تدریس اور تحقیق کی خدمات انجام دے رہے ہیں۔

موجودہ ورژن میں کارڈ کا بنیادی انداز برقرار رکھا گیا ہے، نئے کارڈ میں چینی قومی پرچم کی علامت کے طور پر پانچ ستاروں والے عناصر شامل کئے گئے ہیں اور اس کے خاکے کو بہتر بنایا گیا ہے۔

نئے کارڈ میں جعلسازی کی روک تھام کی جدید ٹیکنالوجی شامل کی گئی ہے اور کوائف محفوظ کرنے اور ایپلی کیشن مینجمنٹ سروس تک رسائی کو بہتر کیا گیا ہے۔

قومی امیگریشن انتظامیہ کے مطابق نئے کارڈ کا اجراء ملک میں اعلیٰ معیار کے کھلے پن کی خدمت کرنے اور چین میں کام کرنے اور رہنے والے غیر ملکی ہنرمند افراد کو بہتر خدمات فراہم کرنے کا ایک خصوصی اقدام ہے۔