بیجنگ (شِنہوا) چین میں رواں سال فروری کے دوران نئی توانائی کی حامل گاڑیوں (این ای ویز ) کی فروخت میں اضافہ ہوا ہے جو کہ آٹوموبائل کی کھپت کو فروغ دینے کی ملک کی کوششوں کے سبب ہے۔
چائنہ پیسنجر کار ایسوسی ایشن کے مطابق گزشتہ ماہ چین میں نئی توانائی سے چلنے والی گاڑیوں کی خوردہ فروخت گزشتہ سال کی نسبت 61 فیصد بڑھ کر 4 لاکھ 39 ہزار یونٹس تک پہنچ گئی ہے۔
ایسوسی ایشن کے اعداد و شمار کے مطابق چین میں مسافر گاڑیوں کی خوردہ فروخت گزشتہ سال کے مقابلے میں 10.4 فیصد بڑھ کر فروری میں 13 لاکھ 90ہزاریونٹس تک پہنچ گئی۔
چین نئی توانائی گاڑیوں کے شعبے کی ترقی کو آگے بڑھانے کے لیے 2014 سے خریداری ٹیکس سے استثناء کی پالیسی پر عمل درآمد کر رہا ہے۔ ستمبر 2022 میں اس نے ترجیحی ٹیکس پالیسی کو 2023 کے آخر تک بڑھا دیا تھا۔
چائنہ ایسوسی ایشن آف آٹوموبائل مینوفیکچررز کے مطابق چین کی نئی توانائی گاڑیوں کی فروخت 2022 کے دوران تقریباً 68 لاکھ90ہزار یونٹس تک پہنچی جو گزشتہ سال کی نسبت 93.4 فیصد بڑھ چکی ہے۔
