ہانگ ژو (شِنہوا) چین کے مشرقی صوبے ژے جیانگ کی غیرملکی تجارت میں 2023 کی پہلی سہ ماہی کے دوران اضافہ ہوا جس کی وجہ نوول کرونا وائرس کی پابندیوں میں نرمی سے ہونے والی معاشی بحالی ہے۔

ہانگ ژو کسٹمز کے مطابق جنوری ۔ مارچ مدت میں صوبے کی مجموعی برآمدات اور درآمدات 11.3 کھرب یوآن (164.2 ارب امریکی ڈالرز) تک پہنچ گئیں جو گزشتہ برس کی نسبت 4.8 فیصد زیادہ ہے۔ صوبے کی برآمدات 6.1 فیصد اضافے سے  835.7 ارب یوآن جبکہ درآمدات 1 فیصد اضافے کے ساتھ 296.9 ارب یوآن رہی۔

مارچ میں مضبوط نمو کے سبب رواں سال کے ابتدائی دو ماہ کی 4.8 فیصد گراوٹ کا رجحان تبدیل ہوکر اضافے میں بدل گیا۔

کسٹمز حکام نے بتایا ہے کہ غیریقینی عالمی معاشی صورتحال کے باوجود ژے جیانگ نے تجارت اور سرمایہ کاری کو مستحکم کرنے اور برآمدی آرڈرز حاصل کرنے کی ہرممکن کوشش کی جس کے مثبت اثرات نظرآنا شروع ہوگئے ہیں۔

اس میں سولر سیلز، برقی گاڑیاں اور لیتھیم آئن بیٹریز کی برآمدات گزشتہ برس کی نسبت 46.2 فیصد اضافے سے  41.4 ارب یوآن ہوگئی ہیں۔ جس کا غیرملکی تجارتی نمو میں حصہ 1.7 فیصد پوائنٹس رہا۔ 

کسٹمز کے مطابق اس عرصے میں بیلٹ اینڈ روڈ سے منسلک ممالک اور خطوں کے ساتھ ژے جیانگ کی غیرملکی تجارت گزشتہ برس  کی نسبت 14.5 فیصد اضافے سے 440.2 ارب یوآن تک پہنچ گئی جبکہ علاقائی جامع اقتصادی شراکت داری ارکان کے ساتھ تجارت  7.3 فیصد اضافے سے  283.8 ارب یوآن رہی۔