بیجنگ (شِنہوا) چین میں جاری عالمی روبوٹ کانفرنس 2023 کے دوران چینی تانگ عہد (907-618) کے شاعروں لی بائی اور ڈو فو کی شکل سے مشابہ انسان نما روبوٹ مقبول ہوئے ہیں۔

ای ایکس روبوٹس کے ایک عہدیدار ژینگ یا شین نے بتایا کہ ان کی جسمانی ساخت اور تاثرات قدرتی نظر آتے ہیں۔ وہ حقیقی افراد کی آوازیں نکالتے، ان کے افعال کی نقل کرتے اور دیکھنے والوں سے بات چیت کرتے ہیں ۔ یہ پہلے ہی ثقافت، سیاحت اور تعلیم سمیت کئی شعبوں میں استعمال ہورہے ہیں۔

بیجنگ میں سات روزہ ایونٹ کا آغاز بدھ سے ہوا تھا جس میں دنیا بھر سے تقریباً 160 روبوٹ اداروں نے شرکت کی۔ ان کمپنیوں نے روبوٹس کی تقریباً 600 اقسام نمائش کے لئے پیش کیں جن میں سے 60  کو پہلی مرتبہ اس ایونٹ کے ذریعے پیش کیا گیا۔

نائب وزیر صنعت اور انفارمیشن ٹیکنالوجی شین گوبن نے بتایا کہ روبوٹ صنعت جدید مینوفیکچرنگ کی نمائندگی کرتی ہے اور انسانی معاشرے کو ایک ذہین دور میں لیکر جارہی ہے۔ یہ عالمی اقتصادی ترقی کو فروغ دیکر بنی نوع انسان کی فلاح و بہبود میں بہتری لارہی ہے۔

انٹرنیشنل فیڈریشن آف روبوٹکس کے مطابق 2022 میں دنیا بھر میں صنعتی روبوٹس کی تعداد 5 لاکھ 31 ہزار یونٹس تک پہنچ چکی تھی جو تاریخ کی بلند ترین سطح ہے۔

شمالی امریکہ، ایشیا اور یورپ کی معیشتوں میں روبوٹس سماجی زندگی میں ضم ہوچکے ہیں جو ان کی قابل ذکر کارکردگی کا اظہار ہے۔

فائل فوٹو، چین کے دارالحکومت بیجنگ میں منعقدہ ورلڈ روبوٹ کانفرنس 2023 میں ایک روبوٹ سرجری کررہا ہے ۔ (شِںہوا)

ورلڈ روبوٹ کانفرنس میں شریک ریئل مین انٹیلی جنٹ ٹیکنالوجی (بیجنگ) کمپنی لمیٹڈ کے نمائشی علاقے میں لوگوں نے روبوٹ کے ذریعے مساج کا تجربہ کیا  جو کمر اور کندھوں کے پٹھوں کو آرام دیتا ہے۔