فرینکفرٹ(شِنہوا)جرمن تھنک ٹینک کی ایک چیئروومن نے کہا ہے کہ "چین سے معاشی تعلق ختم کرنے" کا خیال ایک جغرافیائی سیاسی سازش اور جرمنی کے لیے اقتصادی خودکشی کرنے کے مترادف ہے،جس کے یورپی یونین (ای یو) اور عالمی معیشت کو نتائج بھگتنا پڑ رہے ہیں۔شِنہوا کو دیے گئے ایک خصوصی انٹرویو میں، جرمن تھنک ٹینک شلر انسٹی ٹیوٹ کی بانی اور چیئر وومن ہیلگا زیپ-لا روشے نے خبردار کیا کہ جرمنی کی جانب سے امریکہ کے دباؤ میں چین پر اپنا اقتصادی انحصار کم کرنے کی کوششیں ملک کو انتشار کی طرف لے جائیں گی اور اس کی معیشت بڑے خطرے سے دوچار ہو جائے گی۔
اس بات پر زور دیتے ہوئے کہ چین اور جرمنی کے درمیان تعاون کے وسیع امکانات ہیں اور "ڈی کپلنگ " جرمنی کے مفادات کے خلاف ہے زیپ-لا روشے نے کہا کہ جیسے جیسے جیو پولیٹیکل صورتحال خراب ہوتی جا رہی ہے اور توانائی کا بحران شدت اختیار کرتا جا رہا ہے، جرمنی اور یورپی یونین میں "چین پر انحصار کم کرنے" اور "چین سے الگ ہونے" کے امکانات اور اس سے ہونے والے نقصان پر بحث ہو رہی ہے۔میونخ میں قائم آئی ایف او انسٹی ٹیوٹ فار اکنامک ریسرچ کی ایک تحقیق میں کہا گیا ہے کہ چین سے یورپی یونین اور جرمنی کے الگ ہونے سے جرمنی کو بریگزٹ سے تقریباً چھ گنا زیادہ نقصان ہوگا، جس سے یہ بات سامنے آئی ہے کہ چین کے ساتھ تجارتی جنگ سے آٹوموٹو انڈسٹری کو سب سے زیادہ نقصان اٹھانا پڑے گا۔
