جینان(شِنہوا) چین کے مشرقی صوبہ شان ڈونگ کے شہر ڈی ژو کی پنگ یوان کاؤنٹی میں اتوار کی علی الصبح 2 بج کر 33 منٹ پر آنے والے 5.5 شدت کے زلزلے میں مجموعی طور پر 21 افراد زخمی ہو گئے ہیں۔

مقامی حکام کے مطابق زلزلے کے علاقے میں مجموعی طور پر 126 عمارتیں منہدم ہوگئیں جبکہ وہاں نقل و حمل، مواصلات اور بجلی کی فراہمی معمول کے مطابق رہی اور تیل اور گیس پائپ لائنز میں کوئی لیکج نہیں پایا گیا۔

چائنہ ریلوے بیجنگ گروپ کمپنی لمیٹڈ کے مطابق بیجنگ، تیان جن اور تسانگ ژو سے روانہ ہونے والی 20 سے زائد ریل گاڑیوں کو روک دیا گیا ہے اور شیجیاچوانگ-جینان ہائی اسپیڈ ریلوے کے راستے میں آنے والی تقریباً 30 ریل گاڑیوں کو بھی روک دیا گیا ہے۔

مقامی حکام نے ریسکیو کو منظم کرنے اور ممکنہ خطرات کا اندازہ لگانے کے لئے ہنگامی ردعمل کا آغاز کیا ہے۔