جیوچھوان (شِنہوا) چین کا شین ژو۔ 16 انسان بردار مشن کامیاب رہا اور شین ژو-16 کے خلاباز اچھی صحت کے ساتھ زمین پر واپس پہنچ گئے۔

چائنہ انسان بردار خلائی ایجنسی کے مطابق شین ژو-16 کا واپسی کیپسول منگل کی صبح 8 بجکر 11 منٹ (بیجنگ وقت) پر چین کے شمالی اندرون منگولیا خوداختیارعلاقے میں واقع ڈونگ فینگ لینڈنگ سائٹ پر اترا۔

واپسی کیپسول شین ژو ۔16 کے مدار میں زیرگردش کیپسول صبح 7 بجکر 21 منٹ پر الگ ہوا تھا جس کے بعد بریک انجن  میں شعلہ بھڑکا اور واپسی کا کیپسول پروپلشن کیپسول سے الگ ہو گیا۔

واپسی کیپسول کے اترنے کے فوراً بعد زمین پر موجود  امدادی ٹیم لینڈنگ مقام پر پہنچ گئی جبکہ طبی عملے نے تصدیق کی ہے کہ خلابازوں کی صحت اچھی ہے۔

چین نے 30 مئی 2023 کو انسان بردار خلائی جہاز شین ژو-16 لانچ کیا تھا۔ یہ چین کے خلائی اسٹیشن کے لئے عملی شکل اختیار کرنے اور ترقی کے مرحلے میں پہلا عملہ بردار مشن تھا۔

عملے نے 154 دن مدار میں گزارے اور مجموعی طور پر 70 خلائی تجربات کئے۔ انہوں نے خلا میں چہل قدمی کی، خلائی اسٹیشن سے لیکچر دیا اور کئی بار خلائی اسٹیشن سے سامان باہر نکالنے میں مدد دی۔