شنگھائی (شِنہوا) چین کے پہلے مقامی طور پر تیار کردہ بڑے کروز جہاز نے شنگھائی میں گودی سے الگ ہونے کا عمل مکمل کرلیا جس کے بعد یہ پانی میں حفاظتی جانچ کے مرحلے میں داخل ہوگیا۔

کروز  کو "اڈورا میجک سٹی" کا نام دیا گیا ہے جو 2023 کے اختتام تک فراہم کردیا جائے گا۔

چائنہ اسٹیٹ شپ بلڈنگ کارپوریشن (سی ایس ایس سی) شنگھائی وائی گاؤ چھیاؤ شپ بلڈنگ کمپنی لمیٹڈ کے مطابق اب تک اس کی 93 فیصد سے زیادہ تعمیر اور 85 فیصد سے زیادہ اندرونی کام مکمل ہوچکا ہے۔

اس کروز جہاز کی لمبائی 323.6 میٹرز اور چوڑائی 37.2 میٹرز ہے جبکہ مجموعی وزن 1 لاکھ 35 ہزار 500 ٹن ہے۔ جہاز میں 6 ہزار 500 مسافروں کی گنجائش ہے۔ اس میں ایک لگژری ہوٹل، سینما اور ایک واٹر پارک ہوگا۔

کروز شپ کے آپریٹر سی ایس ایس سی کارنیوال کے منیجنگ ڈائریکٹر راجر چھن نے بتایا کہ کروز جہاز ترسیل کے بعد شنگھائی سے جاپان اور جنوب مشرقی ایشیا کی سمت روانہ ہوگا اور میری ٹائم شاہراہ ریشم کے ساتھ ایک درمیانے اور طویل راستے کا آغاز کرے گا۔

ملک کے دوسرے مقامی ساختہ بڑے کروز جہاز کی تعمیر اگست 2022 میں شروع ہوچکی ہے۔