بیجنگ (شِنہوا) چینی عہدیدار نے جاری سیلابی موسم کے دوران ملک بھر میں آبی ذخائر کی حفاظت یقینی بنانے کی ضرورت پر زور دیا ہے۔

وزیر آبی وسائل  لی گو ینگ نے ایک ویڈیو کانفرنس میں کہا کہ پیشگوئی، انتباہ اور ہنگامی اقدامات بڑھاتے ہوئے ملک بھر کے متعلقہ محکمے آبی ذخائر کی باقاعدگی سے جانچ پڑتال اور دیکھ بھال کریں۔ 

لی نے کہا کہ محکمے موسمیاتی سیٹلائٹس، بارش سے متعلق ریڈارز اور ہائیڈرولوجیکل اسٹیشنز کی مدد سے بارش و سیلاب کی نگرانی کے نظام کا قیام تیز کریں۔ انہوں نے آبی تحفظ کے لئے  ڈیجیٹل ٹیکنالوجیز کے فروغ پر بھی زور دیا۔ 

لی نے مزید کہا کہ آبی ذخائر کو مضبوط بنانے، خطرے سے دوچار آبی ذخائر کا استعمال محدود کرنے اور ان کے اطراف تمام غیر قانونی ڈھانچے ہٹانے کی کوششیں تیز کی جائیں۔

چین میں اس وقت تمام اقسام کے آبی ذخائر کی تعداد 97 ہزار سے زائد ہے۔ ان میں سے بیشتر چھوٹے اور درمیانے درجے کے ہیں۔

ملک نے چھوٹے ذخائر کو تقویت دینے کے لئے 2023 کے بجٹ میں 3 ارب یوآن (تقریباً 43 کروڑ 68 لاکھ امریکی ڈالرز) کی رقم بطور سبسڈی مختص کی ہے۔