بیجنگ (شِنہوا) پہلی چائنہ بین الاقوامی سپلائی چین نمائش (سی آئی ایس سی ای) 28 نومبر سے شروع ہورہی ہے جس میں سرکاری محکموں، کاروباری اداروں ، عالمی تنظیموں، ماہرین اور اسکالرز کے نمائندوں سمیت ایک ہزار سے زائد افراد کی شرکت متوقع ہے۔

چائنہ کونسل برائے عالمی تجارتی تشہیر کے وائس چیئرمین ژانگ شاؤگانگ نے ایک پریس کانفرنس میں بتایا کہ بیجنگ میں ہونے والی نمائش میں 515 چینی اور غیر ملکی کاروباری ادارے اور تنظیمیں شرکت کریں گی جس میں سے متعدد نے دوسری نمائش کے لئے نمائشی جگہ مختص کرالی ہے۔

رواں سال کی تقریب میں 20 سے زائد مختلف سرگرمیوں کا انعقاد کیا جارہا ہے جن میں پالیسی کی وضاحت ، تبادلے اور تبادلہ خیال، ڈاکنگ مذاکرات، نئی مصنوعات کا اجراء اور دیگر موضوعات شامل ہیں۔

نمائش میں اسمارٹ گاڑیوں ، سبز زراعت ، صاف توانائی، صحت مند زندگی اور ڈیجیٹل ٹیکنالوجی میں سپلائی چینز کے لئے نمائشی علاقے مختص کئے گئے ہیں جبکہ نمائش کا مجموعی رقبہ ایک لاکھ مربع میٹر ہے۔

چائنہ بین الاقوامی سپلائی چین نمائش دنیا کی پہلی قومی سطح کی سپلائی چین نمائش ہے۔ بیجنگ میں 28 نومبر سے 2 دسمبر تک منعقد کی جانے والی اس نمائش کا موضوع "مشترکہ مستقبل کے لئے دنیا کو جوڑنا" ہے۔