بیجنگ (شِنہوا) چین میں 2022 کے دوران ترجمہ اور زبان کی خدمات کے شعبے میں فرا ئض سر  انجام دینے والوں کی تعداد 60 لاکھ 10 ہزار رہی جو گزشتہ برس کی نسبت 11.7 فیصد زائد ہے۔

ٹرانسلیٹرز ایسوسی ایشن آف چائنہ (ٹی اے سی) کی سالانہ کانفرنس کی افتتاحی تقریب میں ملک اور دنیا بھر میں ترجمہ اور زبان کی خدمات کی صنعت کی ترقی بارے رپورٹس جاری کی گئیں۔ اس کے علاوہ مختلف شعبوں میں بہترین مترجم کو ایوارڈ زدینے کی تقریب اور قومی ترجمے میں مہارت کا مقابلہ بھی ہوا۔

کمیونسٹ پارٹی آف چائنہ کی مرکزی کمیٹی کے شعبہ تشہیر کے ڈپٹی سیکرٹری جنرل تانگ ہینگ نے تقریب میں کہا کہ چین کے ترجمہ کرنے والوں اور مترجم برادری نے تمام شعبوں میں ملک کے بین الاقوامی تبادلوں میں تعاون اور اضافہ کیا ہے۔

تانگ نے مختلف تہذیبوں کے درمیان باہمی طور پر سیکھنے کے عمل کو بڑھانے، تبادلوں کی راہیں وسیع کرنے، تعاون سے متعلق مواد کو بھرپور بنانے اور مشترکہ مستقبل کے ساتھ انسانی برادری کی تعمیر کے فروغ کی کوششوں پر زور دیا۔

چائنہ فارن لینگو ئجز پبلشنگ ایڈمنسٹریشن اور ٹی اے سی کے سربراہ ڈو ژان یوآن نے بین الاقوامی تبادلے میں فعال طریقے سے شمولیت کی کوششوں پر زور دیا۔