چھونگ چھنگ (شِنہوا) چین میں رواں سال کی ابتدائی 3 سہ ماہی کے دوران نئی بین الاقوامی سمندری زمینی تجارتی راہداری سے 1 لاکھ 26 ہزار سے زائد 20فٹ مساوی یونٹ (ٹی ای یو) کنٹینرز کو ریلوے اور شاہراہوں پر منتقل کیا گیا ۔اس دوران ریل- سمندر انٹرماڈل ٹرینوں میں گزشتہ برس کی نسبت 19 فیصد اضافہ ہوا۔

چین کی جنوب مغربی بلدیہ چھونگ چھنگ میں منعقدہ ایک پریس کانفرنس میں بتایا گیا ہے کہ ستمبر کے اختتام تک چھونگ چھنگ نے 2017 میں نئی بین الاقوامی سمندری زمینی تجارتی راہداری کے آغاز کے بعد سے ان تین اہم نقل و حمل کے نظام کے ذریعے 5 لاکھ 46 ہزار "بیس فٹ مساوی یونٹس" کی ٹرانسپورٹیشن کی جن کی مالیت 90.65 ارب یوآن (تقریباً 12.63 ارب امریکی ڈالر) تھی۔

یہ راہداری چین کے مغربی صوبوں اور آسیان کے رکن ممالک کی تعمیر کردہ تجارتی اور لاجسٹک گزرگاہ ہے جس کا آپریشنل مرکز چھونگ چھنگ ہے۔

راہداری چین کے 18 صوبوں اور 69 شہروں کا احاطہ کرتی ہے ۔ اس کی رسائی 120 ممالک اور خطوں میں 473 بندرگاہوں تک ہے۔