بیجنگ (شِنہوا) قومی عوامی کانگریس میں پیش کردہ ایک رپورٹ کے مطابق گزشتہ 5 برس میں عوامی کانگریس کے نظام کو پوری طرح سے عملی جامہ پہنایا گیا ہے اور اس نے عملی طور پر زبردست قوت اور طاقت کا مظاہرہ کیا ہے۔

قومی عوامی کانگریس کی 13 ویں قائمہ کمیٹی کی 5 سالہ مدت کے اختتام پر جاری رپورٹ میں کہا گیا ہے کہ یہ نظام چین کے بنیادی سیاسی نظام کے طور پر کام کرتا اور حکمرانی کے نظام و صلاحیت کو تقویت دیتا ہے۔

13 ویں قومی عوامی کانگریس کی قائمہ کمیٹی کے چیئرمین لی ژان شو نے 14 ویں قومی عوامی کانگریس کے پہلے سیشن کے مکمل اجلاس میں رپورٹ پیش کی۔

لی کے مطابق قومی مقننہ کے کام کی ایک خاص بات 2018 میں 13 ویں قومی عوامی کانگریس کے پہلے اجلاس میں آئین میں ترمیم کی منظوری تھی۔

گزشتہ 5 برس میں قائمہ کمیٹی نے آئین کے نفاذ ، اس کے اختیار اور تقدس کو برقرار رکھنے کو یقینی بنایا ہے۔

قائمہ کمیٹی نے ان کوششوں میں ایک حصہ کے طور پر انتخابی قانون پر نظر ثانی کی اور قومی عوامی کانگریس کے آئین میں ترمیم کا مسودہ غوروخوض کے لئے قومی عوامی کانگریس میں پیش کیا تاکہ عوامی کانگریسز اور ان کے آپریٹنگ میکانزم کے تنظیمی اور انتخابی نظام کو بہتر بنایا جاسکے۔

قانون سازی میں ترمیم کا مسودہ جاری سالانہ اجلاس میں غور و خوض کے لئے پیش کیا گیا ہے جس سے قانون سازی کے نظام و میکانزم میں بہتری اور قانون سازی کے معیار اور کارکردگی میں اضافہ ہوگا۔

مزید یہ کہ اعلیٰ مقننہ نے ہانگ کانگ خصوصی انتطامی خطے میں قومی سلامتی کے تحفظ بارے قانون نافذ کرکے اور ہانگ کانگ خصوصی انتظامی خطے کے انتخابی نظام کو بہتر بنانے کا فیصلہ کرکے ہانگ کانگ خصوصی انتظامی علاقے میں آئینی نظم و ضبط کو برقرار رکھا ہے۔