شیا من (شِنہوا) پرائمری و سیکنڈری اسکولوں کے چینی طالب علموں میں میوپیا (بینائی کی بیماری) کا مجموعی پھیلاؤ 64.85 فیصد تک پہنچ گیا ہے۔

'بچوں اور نوعمروں میں میوپیا کی قومی روک تھام اور کنٹرول پر وائٹ پیپر'کے عنوان سے یہ رپورٹ چائنہ چیریٹیز ایڈ فاؤنڈیشن فار چلڈرن اور ہواشیا آئی ہاسپیٹل گروپ نے مشترکہ طور پر ایک فورم میں جاری کی۔

یہ مطالعہ 2019 سے 2021 کے درمیان جمع کردہ اعداد و شمار پر مبنی ہے جس میں 19 صوبوں کے 51 شہروں میں 4 ہزار 27 کُل وقتی پرائمری ومڈل اسکولوں کو شامل کیا گیا ہے  جس میں 45 لاکھ 50 ہزار سے زائد طلبا شامل تھے۔

نتائج کے مطابق پرائمری اسکول کے طلبا میں میوپیا کا پھیلاؤ 54 فیصد، مڈل اسکول کے طلباء میں 78.18 فیصد اور ہائی اسکول کے طلباء میں 87.05 فیصد ہے۔ تحقیق کے مطابق لڑکوں کے مقابلے میں لڑکیوں میں میوپیا  کا زیادہ پھیلاؤ ہوتا ہے  جس میں دائیں آنکھ بائیں کے مقابلے میں زیادہ متاثر ہوتی ہے۔

پیکنگ یونیورسٹی کے ایک اہم محقق اور پوسٹ ڈاکٹریٹ  فیلو ہو کنروئی نے میوپیا کی روک تھام کے لئے ایک جامع نقطہ نظر کے حصے کے طور پر طلبا میں برقی آلات پر خرچ ہونے والے وقت کو کم کرنے اور بیرونی سرگرمیوں کی حوصلہ افزائی کرنے جیسی آنکھوں کی صحت مند عادات کو فروغ دینے کی اہمیت پر زور دیا  ۔