بیجنگ(شِنہوا) چین کی 14ویں نیشنل پیپلز کانگریس (این پی سی) کی قائمہ کمیٹی رواں سال 35 بلوں پر غور کرے گی،جن میں سے کچھ بل پہلی بار غور کے لیے پیش کیے جائیں گے۔

14ویں نیشنل پیپلز کانگریس کے پہلے اجلاس کے ترجمان وانگ چھاو نے اتوار کو ہونے والے اجلاس سے ایک روز قبل پریس کانفرنس میں بتایا کہ ان بلوں میں آٹھ شعبوں کا احاطہ کیا جائے گا،جن میں عوامی کانگریس کے نظام کو برقرار رکھنا اور اس میں بہتری لانا،اعلیٰ معیاری سوشلسٹ مارکیٹ اکانومی کا قیام، سائنس اور تعلیم کے ذریعے ملکی ترقی میں پیش رفت، چین کو مضبوط سوشلسٹ ثقافت کے حامل  ملک میں تبدیل کرنا، عوامی فلاح و بہبود کو بہتر بنانا، ماحول دوست ترقی، سماجی حکمرانی کے نظام کی تکمیل اور قومی سلامتی کے لیے قانونی نظام کو بہتر بنانا شامل ہے۔

وانگ نے کہا کہ اگلے پانچ سالوں کے لیے قانون سازی کا منصوبہ بنایا جا رہا ہے، جس میں کلیدی اور ابھرتے ہوئے شعبوں کے ساتھ ساتھ خارجہ امور سے متعلق شعبوں میں قانون سازی کو ترجیح دی جائے گی۔

ترجمان نے کہا کہ 13ویں این پی سی کی قائمہ کمیٹی نے ایک مضبوط قانونی نظام کے قیام کی جانب تاریخی کامیابیاں حاصل کی ہیں، انہوں نے مزید کہا کہ اس کے پانچ سالہ دور میں 47 نئے قوانین بنائے گئے ،111 قوانین پر نظرثانی کی گئی، جبکہ قانون سازی میں عوامی شرکت کے چینلز کو وسعت دی گئی اور قانون سازی کے پورے عمل میں عوامی جمہوریت کی عکاسی کی گئی۔