بیجنگ(شِنہوا)چینی معیشت رواں سال کی دوسری ششماہی جولائی سے دسمبر کے دوران اپنے مستحکم اور مثبت رجحان کو برقرار رکھے گی۔ اس سے پہلے پہلی ششماہی جنوری سے جون کی مدت کے دوران چینی معیشت میں مسلسل بحالی دیکھی گئی تھی۔
نیشنل ڈویلپمنٹ اینڈ ریفارم کمیشن سے تعلق رکھنے والے یوآن دا نے ایک پریس کانفرنس کے دوران جولائی کے لیے مختلف معاشی اشاریوں میں مثبت تبدیلیوں پر روشنی ڈالی جن میں بجلی کی پیداوار میں تیز رفتار نمو، مارکیٹ کی توقعات میں بہتری اور مینوفیکچرنگ پرچیزنگ منیجرز انڈیکس میں دو ماہ کا اضافہ شامل ہے۔
یوآن کے مطابق حکومت کے مسلسل نافذ العمل ہو نے والے پالیسی مکس سے معاشی بہتری کو فروغ ملے گا۔
چین نے رواں سال کاروباری اداروں کے لئے سازگار پالیسیز کو بڑھانے اور مضبوط بنانے کے لئے اہم اقدامات اٹھائے ہیں۔
ان اقدامات میں چھوٹی کمپنیز کے لیے ٹیکس میں چھوٹ دینے سے لے کر نئی توانائی گاڑیوں کے لیے خریداری ٹیکس سے استثنیٰ تک شامل ہیں۔ اس میں ایک مستحکم پالیسی ماحول پیدا کرنا اور کاروباری اداروں کا اعتماد بڑھانا شامل ہے۔
اس کے علاوہ کئی نئے اقدامات بھی کیے گئے جن میں ٹیکنالوجی کمپنی کے لیے مالی معاونت، آٹوموبائل اور الیکٹرانکس کی کھپت کے لیے مراعات اور نجی معیشت کو مضبوط بنانا شامل ہے۔
یوآن نے کہا کہ دوسری سہ ماہی میں نئی معاشی تبدیلیوں کے جواب میں اقدامات کی ایک اور کھیپ بروقت نافذ کی جارہی ہے تاکہ مسلسل معاشی بحالی کے لئے مضبوط پالیسی حمایت پیش کی جاسکے۔
