بیجنگ(شِنہوا) ایک نئی تحقیق کے مطابق  چینی مین لینڈ پر نوزائیدہ بچوں کی متوقع عمر 2035 میں 81.3 سال تک پہنچنے کی امید ہے جبکہ کچھ صوبوں میں خواتین کی عمر 90 سال سے تجاوز کر جائے گی۔

جریدے دی لانسیٹ پبلک ہیلتھ میں شائع ہونے والی یہ تحقیق چین کے سنٹر فار ڈیزیز کنٹرول اینڈ پریونشن اور نانجنگ یونیورسٹی آف سائنس اینڈ ٹیکنالوجی کے محققین نے کی ہے۔ وبائی امراض اور آبادیاتی اعدادوشمارکی بنیاد پر، محققین نے 2035 میں متوقع زندگی کی پیش گوئی کے لیے ایک مروجہ امکانی ماڈل کا استعمال کیا۔

محققین کے تخمینوں سے 96 فیصد امکان ظاہر ہوتا ہے کہ مین لینڈ پر پیدا ہونے والے بچوں کی متوقع عمر 2030 میں 79 سال تک پہنچ جائے گی اور 93 فیصد امکان ہے کہ یہ 2035 میں 80 سال سے تجاوز کر جائے گی۔

متوقع عمر کے حوالے سے زیادہ عمر پانے والے بوڑھے افراد میں خاص طور پر خواتین مردوں سے آگے ہیں ، تحقیق میں اس بات کو اجاگر کیا گیا ہے کہ خواتین کی متوقع عمر 85.1 سال اور مردوں کے لیے 78.1 سال ہے۔

صوبائی سطح پر، بیجنگ میں خواتین 2035 میں سب سے زیادہ متوقع عمر پاسکتی ہیں،جن میں سے  81 فیصد ، 90 سال کی عمر کو پہنچ سکیں گی، اس کے بعد گوانگ ڈونگ، ژی جیانگ اور شنگھائی میں خواتین کی متوقع عمر زیادہ ہے۔