اقوام متحدہ (شِنہوا) اقوام متحدہ میں چین کے مستقل مندوب ژانگ جون نے اسرائیل اور فلسطین کے درمیان فوری جنگ بندی کا مطالبہ کیا ہے۔

فلسطین ۔ اسرائیل صورتحال پر اقوام متحدہ کی سلامتی کونسل کے ہنگامی اجلاس سے خطاب میں ژانگ نے کہا کہ جنگ بندی اور لڑائی کے خاتمے میں تاخیر نہیں کی جا سکتی۔ جنگ بندی کسی بھی طرح سے سفارتی بیان نہیں ہے۔ یہ غزہ کے عوام کے زندہ رہنے کی واحد امید ہے۔

انہوں نے اس بات کا ذکر کیا  کہ تنازع کا موجودہ دور 35 دن سے جاری ہے اور صورتحال مسلسل خراب ہوتی جارہی ہے۔

ژانگ نے کہا کہ "ہم تمام فریقین ، خاص طور پر فریقین پر بھرپور اثر و رسوخ رکھنے والی بڑی طاقتوں سے مطالبہ کرتے ہیں  کہ وہ تمام جغرافیائی سیاسی پہلوؤں اور دوہرے معیارکو بالائے طاق رکھتے ہوئے جنگ بندی اور لڑائی کے خاتمے کی کوششوں پر توجہ مرکوز کریں۔ ہم اسرائیل پر زور دیتے ہیں کہ وہ مغربی کنارے میں آبادکاروں کے بڑھتے ہوئے تشدد کو روکے تاکہ تنازع کو پھیلنے سے بچایا جاسکے۔

انہوں نے مزید کہا کہ 4 ہزار سے زائد بچوں سمیت ہزاروں افراد اپنی جانوں سے ہاتھ دھو بیٹھے ہیں۔  16 لاکھ سے زیادہ لوگ اپنے گھر چھوڑنے پر مجبور ہیں۔23 لاکھ افراد پانی، بجلی، ایندھن، خوراک اور ادویات سے محروم ہیں اور ہسپتالوں، اسکولوں، پناہ گزین کیمپس اور اقوام متحدہ کی تنصیبات کو اکثر نشانہ بنایا جارہا ہے ۔اقوام متحدہ کے سیکرٹری جنرل انتونیو گوتریس بھی اس بارے میں بتا چکے ہیں کہ یہ صرف ایک انسانی بحران نہیں بلکہ انسانیت کا بحران ہے ۔