بیجنگ(شِنہوا)چین کے نائب وزیر اعظم لیو گوژونگ نے حالیہ سیلاب کی تباہ کاریوں سے متاثر ہونے والے علاقوں میں صحت و وبائی امراض کی روک تھام کی سہولتیں بہتر بنانے اور زرعی پیداوار کی بحالی کی کوششوں پر زور دیا ہے۔
کمیونسٹ پارٹی آف چائنہ کی مرکزی کمیٹی کے سیاسی بیورو کے رکن لیوگوژونگ نے ہیبے اور بیجنگ میں اپنے معائنہ کے دورے کے دوران سیلاب زدہ علاقوں اور متاثرہ دیہات کا بھی دورہ کیا۔
انہوں نے اس بات کو یقینی بنانے کی ضرورت پر زور دیا کہ سیلاب کے بعد بڑی وبائی بیماریاں نہ پھوٹیں اور سال بھر بھرپور فصل حاصل کی جائے۔
لیو نے کہا کہ موسم خزاں کے اناج کی فصل کی پیداوار کے لیے یہ ایک اہم وقت ہے جبکہ مقامی حالات کے مطابق فصل کی پیداوار دوبارہ شروع کرنے کے لیے کسانوں کو فوری طور پر متحرک کرنا ضروری ہے۔
لیو نے کہا کہ متعلقہ محکموں کو امداد میں اضافہ کرنا چاہیے، زرعی ڈیزاسٹر ریلیف فنڈز کا بہتر استعمال کرنا چاہیے اور متاثرہ علاقوں کو تیزی سے زرعی پیداوار دوبارہ شروع کرنے میں مدد کے لیے قرضے اور انشورنس کلیم سیٹلمنٹ سروسز کو مضبوط بنانا چاہیے۔
لیو نے مزید کہا کہ گرمی کی شدت کو مدنظر رکھتے ہوئے سیلاب پر قابو پانے اور لوگوں کی صحت کے تحفظ کے لیے وبائی امراض سے بچاؤ کے اہم اقدامات اٹھائے جانے چاہیئں۔
