بیجنگ(شِنہوا) چین کے ریاستی کونسلر اور وزیر خارجہ چھن گانگ اور چین کے دورے پر آئی ہوئی جرمن وزیر خارجہ اینالینا بیربوک نے  بیجنگ میں سفارت کاری اور سلامتی سے متعلق چین-جرمنی سٹریٹجک مذاکرات کے چھٹے دور کی مشترکہ صدارت کی۔

چھن نے کہا کہ سفارتی تعلقات کے قیام کے بعد سے دونوں ممالک نے ہمیشہ باہمی احترام، مساوات کو فروغ دیا اوروہ اختلافات کو دور کرتے ہوئے مشترکہ بنیادوں کی تلاش اور باہمی فائدے کے حصول کے لیے پرعزم رہے ہیں جس سے نہ صرف دوطرفہ تعاون کو فروغ ملا ہے بلکہ چین اور یورپ کے تعلقات کی ترقی میں بھی رہنمائی ملی ہےاور عالمی امن و استحکام کو بھی فروغ ملا ہے۔

چھن نے کہا کہ چین اور جرمنی کے تعلقات نے گزشتہ تین سالوں میں لچک کا مظاہرہ کیا ہے اور خاطر خواہ پیش رفت کی ہےجو اس بات کا مکمل ثبوت ہے کہ مختلف تہذیبیں ایک دوسرے کے ساتھ رہ سکتی ہیں اور  بات چیت، تبادلے اور تعاون چین جرمنی تعلقات کاستون اور صحیح راستہ ہیں۔

چھن نے اس بات پر زور دیتے ہوئے کہ چین اور جرمنی حریف نہیں بلکہ شراکت دار ہیں کہا کہ دونوں ملکوں کو اپنے تعلقات خودمختاری سے قائم کرنے چاہیئں۔

چھن نے کہا کہ چین اعلیٰ معیار کی ترقی اور اعلیٰ سطح کے کھلے پن کو فروغ دینے کے لیے پرعزم ہے جو دنیا کو ایک بڑی چینی مارکیٹ فراہم کرے گا جس سے جرمنی سمیت تمام ممالک کو ترقی کے مزید مواقع میسر آئیں گے۔

انہوں نے کہا کہ چین جرمنی کے ساتھ ہمہ جہتی تبادلوں اور تعاون کو فروغ دینے کا خواہاں ہے ،انہوں نے دونوں فریقوں پر زور دیا کہ وہ چین-جرمنی بین الحکومتی مشاورت اور اعلیٰ سطح کے عوامی مذاکرے کے لیے مشترکہ طور پر تیاری کریں اور دونوں ممالک کے درمیان 70 سے زائد ڈائیلاگ میکانزم کو فعال بنائیں۔