بیجنگ(شِنہوا)چینی وزیر اعظم لی کھ چھیانگ نے برطانیہ کے 48 گروپ کلب کے زیر اہتمام 2023 کے چینی سال نو کی تقریب "آئس بریکرز" کے لیے مبارکباد کا پیغام بھیجا ہے۔پیغام میں لی نے کہا کہ 70 سال قبل برطانوی تاجر برادری کے عقلمند افراد نے بڑی ہمت سے جمود کو توڑتے ہوئے چین اور برطانیہ کے درمیان تجارت کے دروازے کھولے تھے۔ لی نے کہا کہ اس وقت بین الاقوامی اور علاقائی حالات پیچیدہ اور گہری تبدیلیوں سے گزر رہے ہیں ،جغرافیائی سیاست، عالمی معیشت، موسمیاتی تبدیلی، خوراک اور توانائی کے تحفظ اور دیگر شعبوں کو شدید خطرات اور چیلنجز کا سامنا ہے اوریہ  کہ جب مشکلات پیدا ہوتی ہیں تو"آئس بریکنگ" کے جذبے کو جاری رکھنا،تبادلوں اور تعاون کو مضبوط کرنا، تضادات اور اختلافات کو مناسب طریقے سے ہینڈل کرنا، لوگوں کی فلاح و بہبود کو بہتر کرنا اور باہمی مفاد پر مبنی یکساں نتائج حاصل کرنا زیادہ اہمیت اختیار کرجاتا ہے۔چینی وزیر اعظم  نے کہا  کہ چین پرامن ترقی کی راہ پر گامزن ہے اور اصلاحات اور کھلے پن کی بنیادی ریاستی پالیسی کو برقرار رکھتے ہوئے عالمی امن کے تحفظ اور ترقی و خوشحالی کے فروغ کے لیے تمام فریقوں کے ساتھ مل کر کام کرنے کے لیے تیار ہے۔