بیجنگ (شِںہوا) چینی وزیراعظم لی چھیانگ نے صنعتی و سپلائی چین پر عالمی تعاون بڑھانے پر زور دیا۔

انہوں نے یہ بات پہلی چائنہ بین الاقوامی سپلائی چین نمائش اور عالمی سپلائی چین اختراع و ترقی فورم کی افتتاحی تقریب سے خطاب میں کہی۔

چینی وزیراعظم لی نے کہا کہ چائنہ بین الاقوامی سپلائی چین نمائش دنیا کی پہلی قومی سطح کی سپلائی چین نمائش ہے اور عالمی صنعتی و سپلائی چین میں لچک اور استحکام کو برقرار رکھنے کے لئے عالمی اقتصادی ترقی کے فروغ کی ایک اہم ضامن ہے۔

انہوں نے کہا کہ تمام فریقوں کے درمیان رابطے مضبوط بنانے ، تعاون گہرا کرنے اور مشترکہ ترقی کی تلاش میں ایک بین الاقوامی پلیٹ فارم قائم کرنے کے لئے اس نمائش کا اہتمام کیا گیا ہے۔

انہوں نے کہا کہ تاریخ اور زمینی حقائق دونوں نے ثابت کیا ہے کہ جب تک عالمی صنعتی اور رسد چین پر تعاون مستحکم اور گہرا رہے گا تو پوری دنیا کو فائدہ ہوتا رہے گا بصورت دیگر جب چین میں رکاوٹ اور جمود پیدا ہوگا تو دنیا کو نقصان برداشت کرنا پڑے گا۔

انہوں نے کہا کہ چین عالمی صنعتی اور رسد چین کو زیادہ لچکدار، مؤثر اور متحرک بنانے اور عالمی اقتصادی بحالی، ترقی اور خوشحالی کے فروغ میں زیادہ سے زیادہ کردار ادا کرنے کے لئے تمام فریقوں کے ساتھ ملکر کام کرنے کا خواہش مند ہے۔

چینی وزیراعظم لی نے اس موقع پر صنعتی اور سپلائی چین پر بین الاقوامی تعاون وسیع کرنے کے لئے 4 تجاویز بھی پیش کیں۔