ہنوئی (شِنہوا) ویتنام کے ایک سینئر عہدیدار نے کہا کہ چینی صدر اور کمیونسٹ پارٹی آف چائنہ (سی پی سی) کی مرکزی کمیٹی کے جنرل سیکریٹری شی جن پھنگ کے ویتنام کے آئندہ سرکاری دورے سے دونوں ممالک کے عوام کے درمیان دوستی کو مزید فروغ ملنے کی توقع ہے۔

کمیونسٹ پارٹی آف ویتنام (سی پی وی) کی مرکزی کمیٹی کے رکن نگوین ہوانگ آن نے کہا ہے کہ ویتنام اور چین پہاڑوں اور دریاؤں سے جڑے ہمسایہ ممالک ہیں اور دونوں عوام کے درمیان دیرینہ دوستی ہے ۔

انہوں نے یاد دلایا کہ کمیونسٹ پارٹی آف ویتنام کی مرکزی کمیٹی کے جنرل سیکرٹری نگوین فو ٹرونگ نے گزشتہ برس دورہ چین میں صدر شی جن پھنگ کے ساتھ بات چیت کی تھی جس میں دونوں رہنماؤں نے مشترکہ طور پر دوطرفہ تعلقات کی ترقی کی راہ ہموار کی اور اپنے تعلقات کو اعلی سطح تک پہنچایا۔

انہوں نے اس بات کا ذکر کیا کہ رواں سال ویتنام اور چین کے درمیان جامع اسٹریٹجک تعاون کی شراکت داری کی 15 ویں سالگرہ ہے اورایسے میں چینی صدر کا دورہ تاریخی اہمیت کا حامل ہے۔

ریاستی کیپیٹل مینجمنٹ کمیشن انٹرپرائز کے چیئرمین آن نے کہا کہ دونوں فریق دوستانہ تبادلے مزید فروغ دینے اور باہمی تعاون میں پیشرفت کو مستحکم کرنے سے متعلق مختلف شعبوں میں تعاون پر تبادلہ خیال کریں گے۔

انہوں نے کہا کہ ویتنام اور چین کے درمیان اعلیٰ سطح رابطے ایک اچھی روایت ہے اور یہ دوطرفہ تعلقات کی مسلسل ترقی کو فروغ دے رہے ہیں۔