ہانگ کانگ (شِنہوا) ہانگ کانگ خصوصی انتظامی خطے کے چیف ایگزیکٹو جان لی نے کہا ہے کہ چینی صدر شی جن پھنگ کا ہانگ کانگ مڈل اسکول طلبا کے نام جوابی خط ہانگ کانگ کی نوجوان نسل سے اپنے مشن اور ذمہ داریوں کو پورا کرنے کی دلی توقعات کا اظہار ہے۔
لی نے یہ بات ہانگ کانگ خصوصی انتظامی خطے کی جانب سے پوئی کیو مڈل اسکول کے طلبا کو صدر شی کے جوابی خط پر اظہار تشکرکرتے ہوئے کہی۔
خط میں طلبا کی حوصلہ افزائی کی گئی تھی کہ وہ ہانگ کانگ کو مزید بہتر بنانے اور قومی تجدید شباب کے حصول میں اپنا کردار ادا کریں۔
چینی صدر نے جوابی خط میں کہا تھا کہ انہیں اس وقت بے حد خوشی ہوئی جب طلبا نے بتایا کہ چین کے تیان گونگ خلائی اسٹیشن کے خلابازوں کے ساتھ مکالمے کی سرگرمیوں میں حصہ لینے کے بعد انہیں چینی ہونے پر فخر ہے۔
لی نے کہا کہ یہ خط صدر شی کی جانب سے طلبا کی دیکھ بھال اور حوصلہ افزائی کو ظاہر کرتا اور ہانگ کانگ کے تمام اسکولوں کو مختلف قسم کی غیرنصابی سرگرمیوں کے انعقاد کی ترغیب دیتا ہے تاکہ نوجوانوں کو چین کی تاریخ اور موجودہ حقائق بہتر طریقے سے سمجھنے میں مدد ملے۔اس کے علاوہ ملک کے لئے ان کی محبت اور قومی شناخت کا احساس مضبوط ہو۔
انہوں نے کہا کہ اسکولوں کی حوصلہ افزائی کی جاتی ہے تاکہ وہ طلبا میں مادر وطن اور ہانگ کانگ سے محبت پیدا کریں اور اسے آ ئندہ نسلوں میں منتقل کریں۔
لی نے کہا کہ ہانگ کانگ کی موجودہ حکومت نے گزشتہ برس یکم جولائی کو اقتدار سنبھالنے کے بعد سے صدر شی کی اہم تقریر کے مندرجات اور اس کی روح کو پالیسی فریم ورک کے طور پر اپنایا ہے۔
لی نے اس بات پر زور دیا کہ ہانگ کانگ حکومت حب الوطنی اور قومی تعلیم کے فروغ اور اسے مضبوط بنانے کا سلسلہ جاری رکھے گی تاکہ نئی نسل کو عالمی نقطہ نظر، پرجوش ذہنیت اور مثبت سوچ کے ساتھ پروان چڑھایا جاسکے جو مادر وطن اور ہانگ کانگ دونوں سے محبت کرتی ہو۔
