بیجنگ(شِنہوا)چین کے صدر شی جن پھنگ نے یکم جون کو بچوں کے عالمی دن سے قبل بدھ کو بیجنگ میں ایک سکول کا دورہ کیا ۔
کمیونسٹ پارٹی آف چائنہ کی مرکزی کمیٹی کے جنرل سیکرٹری اور مرکزی فوجی کمیشن کے چیئرمین شی جن پھنگ نے نئے دور میں بچوں کی ہمہ جہت ترقی پر زور دیا اور ملک بھر کے بچوں کو تہوار کی مبارکباد دی۔
بیجنگ یوینگ سکول کے دورے کے دوران صدر شی نے کہا کہ بچے ملک کا مستقبل اور قوم کی امید ہیں۔ انہوں نے بچوں کی اخلاقی بنیاد، فکری صلاحیت، جسمانی قوت، جمالیاتی حساسیت اور کام کی مہارت کی اہمیت پر زور دیا۔
صدرشی نے چینی بچوں پر زور دیا کہ وہ نئے دور میں اعلیٰ خواب رکھیں، مطالعہ اور کام سے لطف اندوز ہوں، دوستانہ طرز عمل اپنائیں اور اپنے اندر اختراعات اور کوشش کرنے کا حوصلہ بڑھائیں۔
انہوں نے امید ظاہر کی کہ طلباء ایک مضبوط ملک کی تعمیر اور قومی تجدید میں اپنا حصہ ڈالنے کے مقصد کے ساتھ تعلیم حاصل کریں گے اور اپنے والدین، پارٹی اور عوام کی توقعات پر پورا اتریں گے۔
