بیجنگ(شِنہوا) کمیونسٹ پارٹی آف چائنہ (سی پی سی) کی مرکزی کمیٹی کے جنرل سیکرٹری شی جن پھنگ نے عالمی تجارتی تنظیم (ڈبلیو ٹی او) کی اصلاحات میں فعال طور پر حصہ لینے اوراعلیٰ سطحی کھلے پن کو بہتر بنانے کیلئے کوششوں پر زور دیا ہے۔
صدرشی نے یہ بات بدھ کو سی پی سی کی مرکزی کمیٹی کے سیاسی بیورو کے گروپ اسٹڈی سیشن کی صدارت کرتے ہوئے کہی۔
ڈبلیو ٹی او کو کثیرالجہتی تعاون کا ایک اہم ستون اورعالمی اقتصادی نظم و نسق کا ایک اہم مرحلہ قرار دیتے ہوئے صدرشی نے کہا کہ عالمی تجارتی تنظیم کی ضروری اصلاحات کے نفاذ کے لیے اتفاق رائے پایا جاتا ہے۔
انہوں نے اعلیٰ سطحی کھلے پن کے ساتھ وسیع اصلاحات اور اعلیٰ معیار کی ترقی کو فروغ دینے سمیت ڈبلیو ٹی او کی اصلاحات اور بین الاقوامی اقتصادی اور تجارتی قوانین کی تبدیلیوں میں مکمل طور پر حصہ لینے کی کوششوں پر زور دیا۔
صدرشی نے کہا کہ 20 سال سے زائد عرصہ قبل ڈبلیو ٹی او میں شمولیت کے بعد سے چین دنیا کا سب سے بڑا تاجر اور 140 سے زائد ممالک اور خطوں کے لیے ایک بڑا تجارتی شراکت دار بن گیا ہے جس نے دنیا کی سالانہ اقتصادی ترقی میں اوسطاً 30 فیصد کا حصہ ڈالا ہے۔
انہوں نے کہا کہ چین اور ڈبلیو ٹی او کے درمیان تعلقات میں تاریخی تبدیلیاں رونما ہوئی ہیں جبکہ چین بین الاقوامی اقتصادی اور تجارتی قوانین پر موثر عمل درآمد کر کے اس شعبے میں ایک اہم شراکت دار بن گیا ہے۔
شی جن پھنگ نے کہا کہ حقائق نے ثابت کیا ہے کہ چین کا ڈبلیو ٹی او میں شمولیت کا فیصلہ بالکل درست تھا کیونکہ شمولیت سے نہ صرف چین کی اپنی ترقی میں تیزی آئی ہے بلکہ باقی دنیا کواس سے بھی فائدہ پہنچا ہے۔
