بیجنگ (شِنہوا) چین کے صدر،کمیونسٹ پارٹی آف چائنہ (سی پی سی) کی مرکزی کمیٹی کے جنرل سیکرٹری اور مرکزی فوجی کمیشن کے چیئرمین شی جن پھنگ کی زیر صدارت سی پی سی کی 20ویں مرکزی کمیٹی کے تحت  قومی سلامتی کمیشن کا پہلا اجلاس ہوا۔ کمیشن کے سربراہ صدر شی نے اجلاس سے خطاب کرتے ہوئے 20ویں سی پی سی قومی کانگریس کے رہنما اصولوں پر مکمل طورپرعملدرآمد کرنے، قومی سلامتی کو درپیش پیچیدہ اور چیلنجنگ حالات کو بغور سمجھنے، قومی سلامتی کے اہم مسائل کو صحیح طریقے سے سمجھنے اور ملک کے قومی سلامتی کے نظام اور صلاحیت کو جدید بنانے کی کوششوں کو تیز کرنے کی ضرورت پر زور دیا تاکہ ایک نئے سیکورٹی ڈھانچے کے ساتھ ترقی کے نئے ماڈل کی حفاظت کی جا سکے اور قومی سلامتی کے امورکے لیے نئی راہیں تلاش کی جاسکیں۔

سی پی سی کی مرکزی کمیٹی کے پولیٹیکل بیورو کی قائمہ کمیٹی کے ارکان اور قومی سلامتی کمیشن کے نائب سربراہان لی چھیانگ، ژاؤ لیجی اور کائی چھی نے اجلاس میں شرکت کی۔ اجلاس میں اس بات کی نشاندہی کی گئی کہ کمیشن نے جدوجہد کے جذبے کو آگے بڑھایا ہے، قومی سلامتی کے لیے جامع نقطہ نظر کو برقرار رکھا اور ترقی دی ہے اور قیادت کے ساتھ ساتھ قومی سلامتی کے قانونی، تزویراتی اور پالیسی نظام کو مستقل طور پر بہتر بنایا ہے۔ کمیشن نے قومی سلامتی کے کام کے کوآرڈینیشن میکانزم کو موثر طریقے سے چلانے کو یقینی بنایا  اور اس بات کو یقینی بنایا ہے کہ قومی سلامتی کے نظام نے ملک بھر میں سی پی سی کی مقامی کمیٹیوں کا احاطہ کیا ، قومی خودمختاری، سلامتی اور ترقیاتی مفادات کی حفاظت اور قومی سلامتی کو ہمہ جہت طریقے سے مضبوط بنایا ہے۔