بیجنگ (شِنہوا) چینی صدر شی جن پھنگ نے نئی صنعت کاری کو فروغ دینے کے لئے اعلیٰ معیار کی ترقی کی اہمیت پر زور دیا ہے تاکہ چین کی جدید کاری کے لئے مضبوط مادی اور تکنیکی بنیاد رکھی جا سکے۔
کمیونسٹ پارٹی آف چائنہ (سی پی سی) کی مرکزی کمیٹی کے جنرل سیکرٹری اور مر کزی فوجی کمیشن کے چیئرمین شی جن پھنگ نے نئی صنعت کاری کو آگے بڑھانے کے بارے میں ایک حالیہ ہدایت میں یہ تبصرہ کیا۔
شی جن پھنگ نے کہا کہ نئی صنعت کاری کو عملی جامہ پہنانا چین کی جانب سے ایک مضبوط ملک کی تعمیر اور نئے دور میں قومی تجدید شباب کو آگے بڑھانے کے لیے چینی جدیدکاری کے حصول میں ایک اہم کام ہے۔
چینی جدیدکاری کے لئے ایک مضبوط مادی اور تکنیکی بنیاد رکھنے کے لئے شی نے سائنسی اور تکنیکی انقلاب اور صنعتی تبدیلی کے نئے دور کو اپنانے اور اس کی قیادت کرنے ، نئی صنعت کاری کے فروغ میں اعلیٰ معیار کی ترقی کی تلاش کرنے اور ڈیجیٹل معیشت اور انڈسٹریل انفارمیٹائزیشن کی ترقی کے ساتھ مینوفیکچرنگ پاور ہاؤس کی تعمیر کو ضم کرنے کی کوششوں پر زور دیا۔
شی جن پھنگ کی ہدایات بیجنگ میں جمعہ سے ہفتہ تک منعقد ہونے والے نئی صنعت کاری کو آگے بڑھانے سے متعلق ایک قومی اجلاس میں پڑھ کر سنائی گئیں۔
چینی وزیر اعظم لی چھیانگ نے اجلاس میں شرکت کی اور صنعتی و سپلائی چین کی لچک اور حفاظت کو بہتر بنانے، چین کی صنعتی جدت سازی کی صلاحیت میں بہتری کو تیز کرنے اور ملک کے صنعتی ڈھانچے کو بہتر بنانے اور اپ گریڈ کرنے کو مسلسل فروغ دینے کی اہمیت پر زور دیا۔
سی پی سی کی مرکزی کمیٹی کے سیاسی بیورو کی قائمہ کمیٹی کے رکن لی نے ڈیجیٹل ٹیکنالوجی اور حقیقی معیشت کے گہرے انضمام اور صنعتی شعبے کی سبز ترقی پر زور دیا۔
سی پی سی کی مرکزی کمیٹی کے سیاسی بیورو کے رکن اور نائب وزیر اعظم ژانگ گوچھنگ نے اجلاس میں سائنسی و تکنیکی جدت سازی کو مضبوط بنانے اور صنعتی سلامتی کے تحفظ کے لئے کوششوں پر زور دیا۔
