بیجنگ (شِنہوا) چینی صدر شی جن پھنگ نے امریکہ ۔ چین بزنس کونسل (یو ایس سی بی سی) کے بورڈ آف ڈائریکٹرز اور اس کے تمام ارکان کو کونسل کی 50 ویں سالگرہ پر مبارکباد پیش کی ہے انہوں نے امریکہ کے تمام شعبوں سے وابستہ ان تمام افراد کو بھی مبارکباد دی ہے جنہوں نے طویل عرصے سے چین کے اقتصادی اور تجارتی تعاون کا خیال رکھا اور تعاون کیا ۔

اپنے پیغام میں چینی صدر شی جن پھنگ نے کہا کہ دنیا ایک صدی میں نظر نہ آنے والی ایک بڑی تبدیلی سے گزررہی ہے۔ ایسے میں چین اور امریکہ ان چیلنجز سے نمٹنے کے لیے ملکر کام کرسکتے ہیں کیونکہ ان کا تعلق دونوں ممالک کے عوام کے مفادات اور انسانیت کے مستقبل سے جڑا ہے۔

چینی صدر شی نے کہا کہ سان فرانسسکو میں حالیہ ملاقات کے دوران امریکی صدر جو بائیڈن اور انہوں نے چین ۔ امریکہ تعلقات کے لیے اہم امور پر تفصیل کے ساتھ تبادلہ خیال کیا اور اہم مشترکہ مفاہمت پر پہنچے۔

انہوں نے مزید کہا کہ چین باہمی احترام، پرامن بقائے باہمی اور باہمی تعاون کے اصولوں پر امریکہ کے ساتھ ملکر اس ملاقات کے نتائج پر عمل درآمد اور دوطرفہ تعلقات کی صحت مند، مستحکم اور پائیدار ترقی کے فروغ کے لیے ٹھوس کوششیں کرنے کو تیار ہے۔

چینی صدر شی نے کہا کہ دونوں ممالک کے درمیان کاروباری تعاون نے دونوں ممالک کے عوام کو بہت سے ٹھوس فوائد پہنچائے ہیں جو چین ۔ امریکہ تعلقات کا ایک اہم حصہ ہے۔  چین اعلیٰ معیار کی ترقی اور اعلیٰ معیار کا کھلا پن آگے بڑھانے اور مارکیٹ و قانون پر مبنی عالمی معیار کے کاروباری ماحول کے فروغ بارے پرعزم رہے گا۔

انہوں نے کہا کہ چینی جدیدیت امریکہ اور دیگر تمام ممالک کے کاروباری اداروں کو مزید مواقع فراہم کرے گی۔ دونوں ممالک کے درمیان وسیع تر اقتصادی اور تجارتی تعاون کے وسیع امکانات، وسیع گنجائش اور ایک امید افزا مستقبل موجود ہے۔