بیجنگ (شِنہوا) چینی صدر شی جن پھنگ نے حال ہی میں یو ایس۔چائنہ یوتھ اینڈ اسٹوڈنٹ ایکسچینج ایسوسی ایشن اور امریکی ریاست واشنگٹن میں زندگی کے تمام شعبوں سے وابستہ دوستانہ شخصیات کے ایک خط کا جواب دیا۔

چینی صدر نے اپنے جواب میں چھنگ دو میں 31 ویں انٹرنیشنل یونیورسٹی اسپورٹس فیڈریشن (ایف آئی ایس یو) سمر ورلڈ یونیورسٹی گیمز اور ہانگ ژو ایشیائی کھیلوں کی میزبانی کے لیے نیک خواہشات پر خط لکھنے والوں کا چین کی جانب سے شکریہ ادا کیا ہے۔

صدر شی نے اس بات کا ذکر کیا کہ کھیل ایک ایسا بندھن ہے جو لوگوں میں دوستی کو فروغ دیتا ہے۔

انہوں نے کہا کہ تمام فریقین کی مشترکہ کوششوں سے ایک ہموار ، محفوظ اور شاندار چھنگ دو ایف آئی ایس یو کھیلوں کا کامیابی سے انعقاد کیا گیا۔

صدر شی نے مزید کہا کہ چینی حکومت اور عوام کو ہانگ ژو میں شاندارایشیائی کھیلوں کی میزبانی پرمکمل اعتماد ہے۔

چینی صدر  نے اس بات پر زور دیا ہے کہ چین ۔ امریکہ تعلقات کی بنیاد عوام میں ہے اور اس کا مستقبل نوجوانوں سے ہے ۔

انہوں نے مزید کہا کہ وہ پرامید ہیں کہ چین اور امریکہ کے مزید نوجوان ایک دوسرے کو جان سکیں گے، ایک ساتھ آگے بڑھیں گے، دو طرفہ دوستی کے سفیر بن سکیں گے اور دوطرفہ تعلقات کے فروغ کی مسلسل حوصلہ افزائی کریں گے۔

چینی صدر نے کہا کہ انہیں یقین ہے کہ یوایس۔چائنہ یوتھ اینڈ اسٹوڈنٹ ایکسچینج ایسوسی ایشن اور زندگی کے تمام شعبوں سے وابستہ دوستانہ شخصیات چینی اور امریکی نوجوانوں کے درمیان دوستانہ تبادلوں اور چین۔ امریکہ تعلقات کی مستحکم ترقی میں مزید کردار ادا کریں گی۔

ایسوسی ایشن اور امریکی ریاست واشنگٹن میں زندگی کے تمام شعبوں سے وابستہ دوستانہ شخصیات نے چینی صدر  کو لکھے گئے اپنے خط میں چھنگ دو ایف آئی ایس یو کھیلوں اور ہانگ ژو ایشیائی کھیلوں کی کامیاب میزبانی پر نیک خواہشات کا اظہار کرتے چین اور امریکہ کے درمیان نوجوانوں کے تعاون اور عوامی سطح پر تبادلے بڑھانے کا کہا تھا۔