بیجنگ (شِنہوا) چین کے صدر شی جن پھنگ نے  کامن ویلتھ آ ف ڈومینیکا کے صدر کا عہدہ سنبھالنے پر سلوانی برٹن کو مبارکباد دی ہے۔

اپنے پیغام میں شی جن پھنگ نے ڈومینیکا کو کیریبین خطے میں چین کا مخلص دوست اور قابل اعتماد شراکت دار قرار دیا۔

انہوں نے کہا کہ سفارتی تعلقات کے قیام کے بعد سے چین اور ڈومینیکا نے ہمیشہ ایک دوسرے کے ساتھ برابری کا سلوک کیا ہے اور سیاسی باہمی اعتماد کو مستحکم کرنے سے عملی تعاون کے بامعنی نتائج برآمد ہوئے ہیں اور دونوں ممالک کے عوام کے درمیان دوستی گہری ہوئی ہے۔

شی  نے کہا کہ چین ڈومینیکا کی جانب سے چین کے بنیادی مفادات اور اہم خدشات سے متعلق امور پر چین کے منصفانہ موقف کی مسلسل حمایت کو سراہتا ہے۔

چینی صدر نے کہا کہ میں دوطرفہ تعلقات کی ترقی کو انتہائی قدر کی نگاہ سے دیکھتا ہوں اور صدر برٹن کے ساتھ مل کر کام کرنے کا خواہاں ہوں تاکہ آئندہ سال سفارتی تعلقات کے قیام کی 20 ویں سالگرہ کو دوطرفہ دوستانہ تعلقات کو اعلیٰ سطح پر لے جانے کے موقع کے طور پر لیا جا سکے جس سے  دونوں ممالک کے عوام کو زیادہ سے زیادہ فوائد حاصل ہوسکیں۔