چھانگ چھون (شِنہوا) چین کے شمال مشرقی صوبہ جیلن کے دارالحکومت چھانگ چھون میں منعقدہ 14 ویں چین۔شمال مشرقی ایشیا نمائش میں 84.48 ارب یوآن (تقریباً 11.59 ارب امریکی ڈالر) کے سرمایہ کاری معاہدے ہوئے۔

نمائش کی ایگزیکٹو کمیٹی کے ڈپٹی ڈائریکٹر لیو ہائی چھیانگ نے بتایا کہ اتوار کے روز ختم ہونے والی 5 روزہ نمائش میں مجموعی طور پر 99 منصوبوں پر دستخط ہوئے جس میں سرمایہ کاری کی مالیت کے اعتبار سے نیا ریکارڈ قائم ہوا۔

لیو نے کہا کہ یہ منصوبے نئی توانائی، جدید زراعت، سازوسامان کی تیاری، دواسازی، صحت کی دیکھ بھال اور جدید خدمات سمیت مختلف شعبوں کا احاطہ کرتے ہیں۔

اس نمائش کا موضوع " مستقبل کے لئے تعاون سے شمال مشرقی ایشیا کی مشترکہ ترقی" تھا ۔ اس میں 123 ممالک اور خطوں کے 20 ہزار تاجروں نے آف لائن شرکت کی۔

نمائش نے ان 1 ہزار 840 سے زائد نمائش کنندگان کو آن لائن  پلیٹ فارم فراہم کیا جو شمال مشرقی ایشیا میں تعاون کے مواقع تلاش کررہے ہیں۔ یہ خطہ دنیا کے سب سے متحرک خطوں میں سے ایک ہے۔

چین۔ شمال مشرقی ایشیا نمائش ، چین اور اس کے ہمسایہ ممالک کے درمیان اتفاق رائے پیدا کرنے اور اقتصادی و تجارتی تعاون میں ایک اہم پلیٹ فارم بن چکی ہے۔