دبئی(شِنہوا) چینی سفری اداروں نے بیرون ملک دوروں کا دوبارہ آغاز کردیا ہے۔ نوول کرونا وائرس وبا کے سبب 3 برس کے وقفے کے بعد چینی سیاحوں کا پہلا گروہ ابوظہبی پہنچا تو اس کا شاندار استقبال کیا گیا۔ سیاحتی گروپ 60 چینی سیاحوں پر مشتمل ہے جو کہ چین کے جنوبی شہر گوانگ ژو سے دبئی بین الاقوامی ہوائی اڈے پہنچا تھا۔ چین اور متحدہ عرب امارات (یو اے ای) کے قومی پرچم لہراتے ہوئے ہوائی اڈے پر چینی سیاحوں کو گرمجوشی سے خوش آمدید کہا گیا اور ہموار چیک ان خدمات فراہم کی گئی۔ انہیں تھیم پارک فراری ورلڈ ابوظہبی میں یادگاری تحائف اور خصوصی مراعات دی گئیں۔ فراری ورلڈ ابوظبہی کی جنرل منیجر ڈیانا ٹیلر نے کہا کہ ہم 3 برس بعد پہلی بار اپنے پہلے چینی مہمانوں کا خیرمقدم کرتے ہوئے بہت پرجوش ہیں۔ ہم آپ سب کو ہمارے خوبصورت پارک میں خوش آمدید کہنے کے لئے بے تاب ہیں۔ ہمیں آپ کی کمی محسوس ہوئی۔ یواے ای میں مقامی ٹریول ایجنسی کے سربراہ لیو جیان نے کہا کہ وبا سے قبل یواے ای سیاحوں میں ایک مقبول مقام تھا جو انہیں دوبارہ خوش آمدید کہنے کو تیار ہے۔ انہوں نے بتایا کہ ابوظہبی اور دبئی کے محکمہ سیاحت اور یواے ای کے کچھ مشہور پرکشش مقامات نے ٹور گروپ کے لئے خصوصی پیشکش اور سہولت فراہم کی ہے۔ دبئی کارپوریشن فار ٹورازم اینڈ کامرس مارکیٹنگ (ڈی سی ٹی سی ایم) کے سی ای او عصام کاظم نے چینی مسافروں کے نام ایک ویڈیو پیغام میں کہا کہ اگر ان کے پاسپورٹ کی معیاد 6 ماہ سے زائد ہے تو تمام چینی سیاح "دبئی کے ویزا فری سفر" سے لطف اندوز ہوسکتے ہیں۔