بیجنگ (شِنہوا) مراکش نے مالیاتی جرائم میں ملوث ایک شخص کو چین کے حوالے کردیا ہے۔ چین اور مراکش کے درمیان  ملزمان کی حوالگی کا معاہدہ 2021 میں نافذالعمل ہوا تھا۔

وزارت عوامی تحفظ کے مطابق لیو نامی مشتبہ شخص نے فنانشل ایگزیکٹو کی حیثیت سے خدمات کی انجام دہی کے دوران ایک کمپنی سے مبینہ طور پر لاکھوں یوآن غبن کئے اور مراکش فرار ہوگیا۔

فروری 2020 میں چینی پولیس نے مقدمہ درج کرکے تفتیش کی اور جولائی 2022 میں لیو کے خلاف انٹرپول ریڈ نوٹس جاری کیا ۔

مراکش کی پولیس نے رواں سال اپریل میں لیو کو گرفتار کرلیا اور اکتوبر کے اختتام پر ایک عدالت سے حوالگی کی منظوری حاصل کرکے ہفتے کو چین کے حوالے کردیا۔

وزارت کے ایک عہدیدار نے بتایا کہ لیو کی کامیاب حوالگی چین اور مراکش کے قانون نافذ کرنے والے اداروں اور عدالتی تعاون بڑھانے کے لئے اہم ہے۔ عہدیدار نے بین الاقوامی تعاون مستحکم کرنے اور بیرون ملک جرائم پیشہ مشتبہ افراد کی گرفتاری کے لئے مزید کوششوں کا عہد کیا ہے۔

یہ مقدمہ مالیاتی جرائم کرکے بیرون ملک فرار ہونے والے ملزمان کو پکڑنے کی چین کی برسوں سے جاری کوششوں کا حصہ ہے۔

چین نے 2014 میں " فاکس ہنٹ" آپریشن شروع کیا تھا۔ "فاکس ہنٹ 2022" آپریشن کے دوران چینی پولیس نے مختلف قسم کے مالیاتی جرائم میں ملوث 700 سے زائد سمندر پار مشتبہ افراد کو گرفتار کیا ہے۔