اقوام متحدہ (شِنہوا) چینی کے وزیر خارجہ وانگ یی نے کہا ہے کہ تنازع فلسطین صرف دو ریاستی حل سے سلجھ سکتا ہے۔
کمیونسٹ پارٹی آف چائنہ کی مرکزی کمیٹی کے سیاسی بیورو کے رکن وانگ نے فلسطین۔ اسرائیل تنازع پر اقوام متحدہ کی سلامتی کونسل کے ایک اعلیٰ سطح کے اجلاس کی صدارت کے بعد میڈیا سے گفتگو میں نے اس بات پر زور دیا کہ دو ریاستی حل ہی واحد راستہ ہے۔
وانگ نے کہا کہ تنازع فلسطین کوحل کرنے کے لئے عظیم منصوبوں یا نعروں کی کمی نہیں بلکہ انصاف کے لئے کھڑے ہونے کی ہمت اور اقدامات کا فقدان ہے۔
انہوں نے کہا کہ دو ریاستی حل عالمی انصاف کا بنیادی نکتہ ہے۔ اس سے پیچھے ہٹنے کا کوئی راستہ نہیں ہے۔ آزاد ریاست فلسطینی عوام کا ناقابل تنسیخ قومی حق ہے اور یہ ایسا حق ہے جس پر سودے بازی نہیں ہوسکتی۔
انہوں نے کہا کہ فلسطینی عوام کے ساتھ عرصہ دراز سے ہونے والی تاریخی ناانصافی کو دیکھتے ہوئے کسی کے پاس تاخیر کا کوئی بہانہ نہیں ہے اور نہ ہی اس کے ناقابل عمل ہونے کا کوئی جواز ہے ۔ جب فلسطینی عوام کے مستقبل بارے امور کی بات آتی ہے تو کسی بھی ملک کو ویٹو کا حق حاصل نہیں ہے۔
انہوں نے کہا کہ تنازع فلسطین مشرق وسطیٰ کے مسئلے کا مرکز ہے اور بین الاقوامی ایجنڈے میں اس کی اہمیت کم کرنے کی بجائے اسے ترجیح دی جائے ۔ دو ریاستی حل پر مکمل عمل درآمد سے ہی مشرق وسطیٰ حقیقی امن جبکہ اسرائیل پائیدار سلامتی سے لطف اندوز ہوسکتا ہے۔
چینی وزیرخارجہ وانگ نے کہا کہ چین امن کے فروغ پر اتفاق رائے پیدا کرنے اور تنازع فلسطین کے جامع، منصفانہ اور دیرپا حل کے لئے ٹھوس ٹائم ٹیبل اور روڈ میپ تیار کرنے میں زیادہ وسیع پیمانے پر مبنی، زیادہ مستند اور زیادہ مؤثر بین الاقوامی امن کانفرنس کے انعقاد کا مطالبہ کرتا ہے۔
