بیجنگ (شِنہوا)  چین کے دارالحکومت بیجنگ میں زرعی خوراک میں جدت سے متعلق بین الاقوامی کانفرنس جمعرات کو شروع ہوگئی ، جس میں 60 سے زائد ممالک کے 300 سے زیادہ سائنسدان اور کاروباری افراد شرکت کر رہے ہیں۔ "فوڈ سیکورٹی اینڈ فیوچر ایگری فوڈ" کے تھیم کے ساتھ 2023 کی ورلڈ ایگری فوڈ انوویشن کانفرنس میں ایک مرکزی فورم، چار موضوعاتی فورمز، ایگری فوڈ سائنس وٹیکنالوجی پر مشتمل ایک ایکسپو کے ساتھ ساتھ متعدد ذیلی فورمز اور سائڈ لائن فورمزکاانعقاد کیاجارہا ہے۔

 چائنہ ایگریکلچرل یونیورسٹی کے پروفیسرہی شیاونگ کوئی نے کہا کہ تین روزہ ایونٹ میں شرکاء کے لیے جدید ترین زرعی ٹیکنالوجی کی کامیابیوں کا تبادلہ، عالمی زرعی جدیدیت کی ترقی پر تبادلہ خیال اور زرعی سائنس وٹیکنالوجی تعاون کے ایک نئے نمونہ کی تشکیل پیش کی جائے گی۔

ایکسپو میں، پیٹکوس نامی جرمن ٹیکنالوجی کمپنی نے بیج پروسیسنگ کے لیے اپنا جدید طریقہ کارپیش کیا۔ کمپنی کے چیف فنانشل آفیسرہیننگ ہوپنر نے کہا ہے کہ چین کے پاس بیجوں کی صنعت کے شعبے میں زیادہ سے زیادہ پیشہ ور افراد موجود ہیں، اور ہم اس شعبے میں مضبوط تعاون کے خواہاں ہیں۔