بیجنگ (شِنہوا) چینی وزارت خارجہ نے کہا ہے کہ پابندیاں اور رکاوٹیں چین کی ترقی کو نہیں روک سکیں گی بلکہ اس سے صرف خود انحصاری اور تکنیکی جدت کے حصول کے لیے اس کا عزم اورصلاحیت مزید مضبوط ہوگی۔
وزارت خارجہ کی ترجمان ماؤ ننگ نے ان خیالات کا اظہار روزانہ کی پریس بریفنگ میں امریکی حکومت کی جانب سے ہواوے کے جدید ترین سمارٹ فون میں چین میں تیار کردہ چپ کے حوالے سے باضابطہ تحقیقات شروع کرنے سے متعلق ایک سوال کے جواب میں کیا ،اس معاملے نےپابندیوں کی افادیت کے بارے میں واشنگٹن میں ایک نئی بحث کا آغاز کردیا ہے۔
ماؤ نے کہا کہ چین تجارت اور ٹیکنالوجی کے امورپر سیاست کرنے اور قومی سلامتی کے تصور کو وسیع اوراس کے غلط استعمال کرنے کی مخالفت کرتا ہے۔
انہوں نے کہا کہ امریکہ نے چینی کمپنیوں کو دبانے کے لیے ریاستی طاقت کا غلط استعمال کیا جو آزاد تجارت اور بین الاقوامی تجارت کے اصولوں کی خلاف ورزی ہے اس سے عالمی صنعتی وسپلائی چین غیر مستحکم ہوئی ہے اوراس طرح کا طرز عمل کسی کے مفاد میں نہیں ہے۔
