ارمچی(شِنہوا)چین کی وزارت خارجہ کی دعوت پر برازیل، ایران، انڈونیشیا، پاکستان، ایکواڈور اور سینیگال سمیت 14 ممالک کے سفیروں نے 24 سے 28 اپریل تک  چین کے  شمال مغربی سنکیانگ ویغور خود اختیار علاقے کا دورہ کیا۔

چین کے مختلف شہروں میں تعینات 14 ممالک کے قونصل جنرلز نے علاقائی دارالحکومت ارمچی کے ساتھ ساتھ کاشغر، ترپان اور سنکیانگ کے دیگر مقامات کا دورہ کیا تاکہ علاقے کی سماجی اور اقتصادی ترقی کو بذات خود دیکھا  جا سکے۔

انہوں نے کہا کہ سنکیانگ کی کامیابیاں قابل ذکر ہیں اور تمام نسلی گروہوں کے لوگ ہم آہنگی اور خوشی سے ایک ساتھ رہ رہے ہیں۔ ان کا کہنا تھا  کہ بعض مغربی میڈیا کی طرف سے من گھڑت مختلف جھوٹ سنکیانگ کی حقیقت سے پوری طرح مطابقت نہیں رکھتے۔

چھینگڈو میں پاکستان کے قائم مقام قونصل جنرل آغا حنین عباس خان نے سنکیانگ کی انسداد دہشت گردی اور انتہا پسندی  کوششوں سے متعلق ایک نمائش کا دورہ کرنے کے بعد کہا کہ دہشت گردی کو جڑ سے اکھاڑ پھینکنے کے لیے، خطے کی ترقی کے لیے ایک جامع منصوبہ بنانا اور لوگوں کی زندگیوں کو بہتر بنانے میں مدد کرنا بہت ضروری ہے۔

انہوں نے مزید کہا کہ چین نے اس حوالے سے زبردست پیش رفت کی ہے۔