بیجنگ (شِںہوا) چین کے صدر شی جن پھنگ نے شمال مغربی ننگ شیا ہوئی خوداختیار خطے میں باربی کیو ریستوران دھماکے میں زخمی ہونے والوں کو ہر ممکن علاج اور امداد کی ہدایت دیتے ہو ئے وسیع تر حفاظتی اصلا حات پر زور دیا ہے۔

کمیونسٹ پارٹی آف چائنہ کی مرکزی کمیٹی کے جنرل سیکرٹری اور مرکزی فوجی کمیشن کے چیئرمین شی نے حادثہ کے بعد ہدایت جاری کرتے ہوئے کہا کہ لوگوں کی جان و مال کا تحفظ یقینی بنانے کی مزید کوششیں کی جائیں۔

مقامی حکام نے بتایا کہ ننگ شیا کے دارالحکومت ین چھوان میں ایک باربی کیو ریستوران میں بدھ کی شب ہونے والے دھماکے میں 31 افراد ہلاک اور 7 زخمی ہوئے تھے۔

چینی صدر نے حادثے کی وجوہات کا جلد از جلد پتہ لگانے اور قانون کے مطابق متعلقہ افراد کے احتساب کا بھی کہا ہے ۔

انہوں نے کہا کہ تمام خطوں اور متعلقہ محکموں کو ہر قسم کی صورتحال اور پوشیدہ خطرات کی جانچ پڑتال کرنی اور ان کی اصلاح کرنی چاہئے۔

 شی نے مزید کہا کہ متعلقہ محکمے کام کی جگہوں بارے حفاظتی اقدامات کے فروغ ، اہم شعبوں اور صنعتوں کی حفاظت بہتر بنانے کے لئے جلد از جلد ایک مہم شروع کریں۔

چینی صدر کی ہدایت پر مرکزی حکومت کے متعدد اداروں پر مشتمل ایک ورک گروپ کو امدادی کاموں میں رہنمائی کے لیے جائے وقوعہ پر بھیج دیا گیا ہے۔ حادثے کی وجوہات جاننے کے لئے تفتیش جاری ہے۔