شنگھائی (شِنہوا) شنگھائی بین الاقوامی فلمی میلے کے 25 ویں ایڈیشن میں پہلے سائنس فکشن فلم ہفتے کا انعقاد کرتے ہو ئے ملک کی تیزی سے بڑھتی ہوئی سائنس فکشن فلم انڈسٹری کی بہترین فلموں کو یکجا کیا گیا ہے۔
اتوار سے شروع ہونے والے اس ایونٹ میں ملکی اور غیرملکی سائنس فکشن فلموں کی نمائش اور فیچر فورم کا انعقاد کیا جارہا ہے جس میں 1980 کی دہائی میں عکس بند کی جانے والی کلاسک چینی سائنس فکشن فلمیں بھی شامل ہیں۔
اتوار کو اس کے مرکزی فورم میں متعدد معروف سائنس فکشن فلم سازوں نے شرکت کی جن میں چین کی مقامی سائنس فکشن بلاک بسٹر فلموں "دی ونڈرنگ ارتھ" اور "دی ونڈرنگ ارتھ 2" کے ڈائریکٹر گو فین بھی شامل تھے۔
گو نے "دی ونڈرنگ ارتھ 3" کے منصوبے بارے بتایا کہ ان کی ٹیم مصنوعی ذہانت (اے آئی) ٹیکنالوجیز سمیت نئی ٹیکنالوجیز پر گرفت حاصل کرنے میں زیادہ وقت صرف کرے گی جو مستقبل میں فلم سازی میں گیم چینجر ثابت ہوں گی۔
منتظمین نے بتایا کہ سائنس فکشن فلم ہفتے میں آمدہ سال میں ملک کے سب سے نمایاں سائنس فکشن فلم منصوبوں بارے معلومات بھی فراہم کی جائیں گی۔
چین کے مشرقی شہر شنگھائی میں 25 ویں شنگھائی بین الاقوامی فلمی میلے کا آغاز جمعے سے ہوا ہے ۔اس 9 روزہ میلے میں شنگھائی کے 41 سینما گھروں میں مقامی و غیرملکی تقریباً 450 فلمیں دکھائی جائیں گی۔
شنگھائی بین الاقوامی فلمی میلے کا آغاز 1993 میں ہوا تھا اور اس نے چین کی تیزی سے بڑھتی فلم مارکیٹ کے سبب عالمی توجہ حاصل کرلی ہے۔ فلم ڈیٹا پلیٹ فارمز ماؤیان اور بیکن کے مطابق چین میں 2023 کے باکس آفس نے مئی کے اوائل میں 20 ارب یوآن (تقریباً 2.8 ارب امریکی ڈالر) کا سنگ میل عبور کرلیا ہے۔
