میکسیکو سٹی (شِنہوا)  نکاراگووا کے وزیر برائے ترقی، صنعت وتجارت جیسس برموڈیز نے کہا ہے کہ چائنہ (شنگھائی) پائلٹ فری ٹریڈ زون (ایف ٹی زیڈ) ایک عظیم ادارہ جاتی اختراع ہے جس نے گزشتہ دہائی کے دوران عالمی تجارت اورترقی میں اہم کردار ادا کیا ہے۔

شِنہوا کو دئے گئے ایک انٹرویو میں، برموڈیز نے کہا کہ عالمی تجارت میں مسابقت بڑی حد تک کامیابی کی کلید ہے،اوراسی چیز کوشنگھائی ایف ٹی زیڈ نے 2013 میں چین میں اپنے آغاز کے بعد سے پیش کیا ہے۔

برموڈیز نے کہا کہ شنگھائی ایف ٹی زیڈ ایک اہم منصوبہ ہے جس نے غیر ملکی سرمایہ کاری اور بین الاقوامی تجارت کے حوالے سے مصنوعات اور خدمات دونوں میں کھلے پن کی ایک عمدہ مثال قائم کی ہے۔

انہوں نے کہا یہ غیر ملکی تجارت کے لیے انتہائی اہم ہے کیونکہ یہ عام طور پر تجارت کو آسان بنانے کے لیے ایک طریقہ کار کے طور پر کام کررہاہے، جس سے ایک زیادہ موثر اور مسابقتی کاروباری ماحول پیدا ہوتا ہے۔

انہوں نے مزید کہا کہ پائلٹ ایف ٹی زیڈنے چین کی اقتصادی تبدیلی اور جدیدیت کے عمل کو تیز کیا ہے، جس کو نکارا گوا بہتر طور سے سمجھتا ہے اوروہ  اپنی خصوصیات اور ترقی کی ضروریات کو مدنظر رکھتے ہوئے برسوں سے اس پر عمل درآمد کر رہا ہے۔

نکاراگوا کے وزیر نے کہا کہ یہ وہ چیز ہے جس کا ہم چین کے ساتھ اشتراک کررہے ہیں۔ ہمارے پاس آزاد تجارتی زون بھی ہیں، جوبرآمدات میں اضافہ اورملک میں  سرمایہ کاری میں اضافے پر مبنی ترقیاتی ماڈل کے طور پر کام کررہا ہے۔

شنگھائی ایف ٹی زیڈ کی 10 ویں سالگرہ کے موقع پر ہونے والے فورم پر جاری کردہ ایک وائٹ پیپر کے مطابق، شنگھائی ایف ٹی زیڈ میں 2022 کے آخر تک 84ہزار نو تعمیر شدہ کاروباری اداروں نے شمولیت اختیار کی۔