شی آن (شِنہوا) چینی نائب وزیراعظم ہی لی فینگ نے تاجروں پر زور دیا کہ وہ کاروباری جذبے کو برقرار رکھتے ہوئے نئے اورجرات مندانہ اقدمات اٹھائیں اورچین-وسطی ایشیا تعاون میں شراکت دار بنیں۔
ہی لی فینگ نے ان خیالات کا اظہار شمال مغربی صوبہ شانشی کے شہر شی آن میں چین وسطی ایشیا بزنس کونسل کی افتتاحی کانفرنس سے خطاب کرتے ہوئے کیا۔ نائب وزیر اعظم نے کہا کہ چین-وسطی ایشیا میکانزم کے تحت کاروباری مکالمے کے پلیٹ فارم کی حیثیت سے بزنس کونسل کوتمام وسائل بروئے کار لاتے ہوئے چین-وسطی ایشیا تعاون کو فروغ دینے کے لیے اپنی حکمت اور طاقت کو استعمال کرنا چاہئے۔
انہوں نے کہا کہ چین اور وسطی ایشیائی ممالک کے سربراہان مملکت نے جمعرات اور جمعہ کو یہاں منعقدہ چین-وسطی ایشیا سربراہی اجلاس میں چین-وسطی ایشیائی تعلقات کی مستقبل کی ترقی کا خاکہ تیار کیا۔ انہوں نے کہا کہ چین وسطی ایشیائی ممالک کے ساتھ اپنی ترقیاتی حکمت عملیوں کو بہتر طور پر ہم آہنگ کرنے، بنیادی ڈھانچے کے رابطوں کو مضبوط بنانے، تجارتی تعاون کو وسعت دینے، باہمی مفاد پرمبنی سرمایہ کاری کو فروغ دینے اور تعاون کے نئے شعبوں کو فعال طور پر تلاش کرنے کے لیے کام کرے گا۔
