بیجنگ (شِنہوا) چین میں قومی صحت کمیشن نے زلزلے سے متاثرہ صوبے گانسو میں امدادی کارروائیوں میں مدد کے لئے طبی ماہرین کی ٹیم بھیج دی ہے جہاں  پیر  اور منگل کی درمیانی شب 6.2 شدت کا زلزلہ آیا تھا۔

کمیشن نے گانسو اور اس کے ہمسایہ صوبے چھنگ ہائی میں امدادی کارروائیوں میں حصہ لینے کے لئے سیچھوان، شانشی اور ننگ شیا سمیت مختلف علاقوں سے ہنگامی طبی ٹیموں کو مربوط کردیا ہے۔

کمیشن کے مطابق زلزلے کے فوراً بعد گانسو صوبائی صحت کمیشن نے 33 ایمبولینسوں اور 173 افراد کے طبی عملے پر مشتمل ایک ٹیم سمیت گاڑیاں زلزلے زدہ علاقوں میں زخمیوں کے علاج اور منتقلی کے لیے روانہ کردی ہیں جبکہ چھنگ ہائی نے 68 ایمبولینسیں اور 40 سے زائد ماہرین کو صوبے کے متاثرہ علاقوں میں بھیجا ہے۔

کمیشن نے بتایا کہ منگل کی صبح 6 بجکر 30 منٹ تک 300 سے زائد زخمیوں کو زلزلے سے متاثرہ علاقوں میں علاج کے لئے منتقل کردیا گیا تھا۔

کمیشن نے ضرورت کے مطابق مزید طبی امدادی دستے بھیجنے کا عزم دہرایا ہے تاکہ قدرتی آفات سے متاثرہ علاقوں میں لوگوں کی حفاظت اور فلاح و بہبود کو ہر ممکن حد تک یقینی بنایا جاسکے۔