پاکستان کرکٹ بورڈ کے ڈائریکٹرز اور اعلی انتظامی عہدیداروں کے غیر ملکی دوروں پر گزشتہ تین مالی سالوں کے دوران کروڑوں روپے خرچ کیے گئے۔ دستیاب سرکاری اخراجات کی تفصیلات کے مطابق بعض عہدیداروں کے سفری اخراجات غیر معمولی حد تک بلند رہے۔مالی سال 2023-24، 2024-25 اور 2025-26 کے اعدادوشمار سے ظاہر ہوتا ہے کہ بین الاقوامی کرکٹ سرگرمیوں، مقابلوں، اجلاسوں اور تشہیری سرگرمیوں کے سلسلے میں بیرونِ ملک سفر کرنے والے اعلی حکام پر ہوائی سفر، یومیہ الانس، رہائش اور مقامی آمدورفت کی مد میں بھاری رقوم خرچ کی گئیں۔پاکستان سپر لیگ کے چیف ایگزیکٹو افسر کے غیر ملکی سفری اخراجات مالی سال 2024-25 میں ایک کروڑ 49 لاکھ روپے تک پہنچ گئے، جو 2023-24 میں ایک کروڑ 14 لاکھ 50 ہزار روپے تھے۔ اگرچہ 2025-26 میں یہ رقم کم ہو کر 61 لاکھ 70 ہزار روپے رہ گئی، تاہم تین سالہ مجموعی اخراجات نمایاں رہے۔ صرف 2024-25 میں ہوائی ٹکٹوں پر ایک کروڑ 17 لاکھ روپے سے زائد خرچ کیے گئے۔ڈائریکٹر رابطہ کاری کے اخراجات 2023-24 میں 59 لاکھ 70 ہزار روپے سے بڑھ کر 2024-25 میں دو کروڑ 17 لاکھ 70 ہزار روپے تک جا پہنچے جو دستیاب اعدادوشمار میں سالانہ بنیاد پر سب سے زیادہ رقم ہے۔

اس میں تقریبا 90 فیصد حصہ ہوائی سفر کے اخراجات پر مشتمل تھا جو ایک کروڑ 95 لاکھ 20 ہزار روپے رہے۔ اگلے مالی سال میں اگرچہ یہ اخراجات کم ہو کر ایک کروڑ 22 لاکھ 70 ہزار روپے ہوگئے، تاہم یہ اب بھی اعلی ترین اخراجات میں شمار ہوتے ہیں۔چیف فنانشل افسر کے غیر ملکی سفری اخراجات بھی قابلِ ذکر رہے۔ اس عہدے پر 2024-25 میں 39 لاکھ 20 ہزار روپے اور 2025-26 میں 43 لاکھ 20 ہزار روپے خرچ کیے گئے جن کی بڑی وجہ ہوائی سفر اور رہائش کے اخراجات تھے۔اسی طرح چیف فنانشل افسر نے 2024-25 میں بیرونِ ملک سفر پر 42 لاکھ 60 ہزار روپے خرچ کیے جبکہ 2023-24 میں یہ رقم 10 لاکھ 80 ہزار روپے تھی۔ بعد ازاں 2025-26 میں یہ اخراجات کم ہو کر 20 لاکھ 50 ہزار روپے رہ گئے۔میڈیا و مواصلات کے ڈائریکٹر کے غیر ملکی سفری اخراجات 2024-25 میں 54 لاکھ روپے رہے جبکہ اگلے مالی سال میں یہ کم ہو کر 12 لاکھ 40 ہزار روپے رہ گئے۔پاکستان سپر لیگ کے ڈائریکٹر نے 2025-26 میں 57 لاکھ 80 ہزار روپے کے سفری اخراجات ظاہر کیے جن میں یومیہ الانس، رہائش اور ہوائی سفر شامل تھے۔

اس کے مقابلے میں 2023-24 میں اسی دفتر کے اخراجات صرف ایک لاکھ چار ہزار 746 روپے تھے جبکہ اگلے سال کوئی خرچ ریکارڈ نہیں کیا گیا۔ٹیموں کی سکیورٹی کے ڈائریکٹر کے اخراجات 2023-24 میں 8 لاکھ 5 ہزار 520 روپے، 2024-25 میں 6 لاکھ 46 ہزار 62 روپے اور 2025-26 میں بڑھ کر 38 لاکھ 30 ہزار روپے ہوگئے جو سکیورٹی سے متعلق بیرونِ ملک ذمہ داریوں میں اضافے کی نشاندہی کرتے ہیں۔اعدادوشمار کے مطابق زیادہ تر عہدوں پر سب سے بڑا خرچ ہوائی ٹکٹوں کی مد میں کیا گیا جبکہ اس کے بعد یومیہ الانس اور رہائش کے اخراجات نمایاں رہے۔اگرچہ پی سی بی حکام کا مقف ہے کہ عالمی کرکٹ مقابلوں، دوطرفہ روابط اور لیگ سے متعلق سرگرمیوں میں شرکت کے لیے غیر ملکی سفر ناگزیر ہے تاہم اخراجات کے یہ اعدادوشمار ملکی کرکٹ کے انتظامی ادارے میں بیرونِ ملک سفر پر ہونے والے بھاری خرچ اور مالی نظم و ضبط کے حوالے سے نئی بحث کو جنم دے سکتے ہیں۔

کریڈٹ: انڈیپنڈنٹ نیوز پاکستان-آئی این پی ویلتھ پاک