سعودی عرب نے 95 ویں قومی دن کی مناسبت سے آج 23 ستمبر ( منگل کو) ملک بھر میں عام تعطیل کا اعلان کر دیا۔عرب میڈیا کے مطابق سعودی عرب آج 23 ستمبر کو اپنا 95 واں قومی دن بھرپور ملی جوش و جذبے کے ساتھ منا رہا ہے ۔ اس موقع پر مملکت بھر میں شہریوں اور غیر ملکی باشندوں کے لئے عام تعطیل کا اعلان کیا گیا۔ یہ دن 1932 میں بانیِ مملکت شاہ عبدالعزیز کے اس تاریخی فرمان کی یاد دلاتا ہے جس کے تحت نجد اور حجاز کو متحد کر کے سعودی عرب کے نام سے ایک ریاست قائم کی گئی تھی۔پہلی بار 1965 میں فرمانروا شاہ فیصل کے دور میں قومی دن منایا گیا تھا اور 2005 میں شاہ عبداللہ کے شاہی فرمان کے بعد اسے مستقل سرکاری تعطیل کا درجہ دیا گیا۔ اس سال قومی دن کو ہمارا فخر ہماری فطرت میں ہے کا نام دیا گیا ہے جو سعودی عوام کی ثقافتی روایات اور قدرتی ورثے کو اجاگر کرتا ہے۔جنرل انٹرٹینمنٹ اتھارٹی کے مطابق یہ تھیم سعودیوں کی مہمان نوازی، جرات، وقار، سخاوت اور بلند حوصلے جیسے اوصاف کو نمایاں کرتا ہے۔

کریڈٹ: انڈیپنڈنٹ نیوز پاکستان-آئی این پی